नेकपा एमालेका सचिव एवं पूर्वमन्त्री योगेश भट्टराईले अस्ट्रेलियाको भिक्टोरिया राज्यको संसदको अवलोकन भ्रमण गरेका छन्।
गैरआवासीय नेपाली संघको निमन्त्रणामा युथ कन्क्लेभमा भाग लिन यहाँ आएका उनलाई मेलबर्नमा भिक्टोरियाको संसदमा सांसद क्याथलिन म्याथ्यू वार्डले स्वागत गरिन्।
अस्ट्रेलिया नेपाल पार्लियामेन्ट्री फ्रेन्ड्सकी सचिव समेत रहेकी उनले आफ्ना लागि यो विशेष अवसर बनेको बताएकी थिइन्।
दुई नेताबीच अस्ट्रेलिया र नेपालको राजनीतिक पद्धति र संघीय संरचनाहरूले गर्ने काम, संसदको संरचना र काम कारबाही, महिला सहभागिता, अस्ट्रेलिया र नेपालबीचको सम्बन्धका महत्वपूर्ण आयामहरू लगायतमा कुराकानी भएको थियो।
क्याथलिनले नेता भट्टराईलाई संसद भवनको भ्रमण गराएकी थिइन्।
उक्त अवसरमा भिक्टोरियाका लागि नेपाली वाणिज्यदूत निराजन गौली, अस्ट्रेलियन नेप्लिज जर्नलिष्ट एसोसिएसनका अध्यक्ष चिरञ्जीवी देवकोटा, प्रवासी नेपाली मञ्च भिक्टोरियाका ईन्चार्ज प्रकाश सेढाईं, मञ्चका भिक्टोरिया अध्यक्ष गणेश गौतम, द्रोण पन्त लगायत उक्त अवसरमा सहभागी थिए।
होम्स कलेजका सिइओसँग भेट
यसअघि, सचिव भट्टराईले होम्स कलेजका सिइओ स्टेफन नेगलसँग भेट गरेका थिए।
अस्ट्रेलियामा विगत ६० वर्षअघि स्थापना भएको कलेजमा नेपाली विद्यार्थीहरूको पढाइको इतिहास नै २० वर्षभन्दा पुरानो छ। विभिन्न देशका ५ हजार विद्यार्थी पढ्ने कलेजमा ब्याचलर अफ एभिएसन र ब्याचलर अफ एभिएसन म्यानेजमेन्ट समेत पढाइ भइरहेको छ।
पछिल्लो समय कलेजले मास्टर्स अफ ड्रोन टेक्नोलोजी पढाइको तयारी गरिरहेको जानकारी स्टेफनले गराएका थिए।
सिइओ स्टेफन नाग्लेले आफ्नो सन् १९७० ताकाको नेपाल भ्रमणको सम्झना गरेका थिए।
उनले लाङटाङ राष्ट्रिय निकुञ्ज हुँदै पदयात्रामा गएको र नेपालको यात्रा सदैव स्मरणमा रहेको भन्दै छिट्टै भ्रमण गर्न योजना बनाइरहेको बताएका थिए। उनले कलेजको अत्याधुनिक ल्याबका विषयमा जानकारी गराएका थिए।
उक्त भेटमा चिफ अपरेटिङ अफिसर एलेक्स एन्डरसनले हवाई उड्डयन क्षेत्रमा दक्ष जनशक्ति उत्पादन गरिरहेको जानकारी गराएका थिए। नेपालीहरू मेहनती र पढाइमा पनि अब्बल आफूले पाएको उनको प्रतिक्रिया थियो।
