अभिनेता दयाहाङ राई र मिरुना मगर अभिनीत फिल्म 'जारी' को पहिलो गीत सार्वजनिक भएको छ।
शनिबार फिल्ममा समावेशी 'चरी बस्यो' बोलको गीत सार्वजनिक गरिएको हो। कालीप्रसाद बाँस्कोटाको स्वर, शब्द तथा संगीत रहेको गीतमा दयाहाङ र मिरुनाबीचको प्रेमिल नोकझोकलाई देखाइएको छ।
उपेन्द्र सुब्बाको लेखन तथा निर्देशन रहेको फिल्मलाई रामबाबु गुरुङले निर्माण गरेका हुन्।
लिम्बु समुदायको प्रेमकथामा आधारित फिल्ममा आफ्नी श्रीमतीलाई फिर्ता ल्याउन पुरूषले गर्नु परेको संघर्षलाई देखाइनेछ।
बासुरी फिल्म्स ब्यानरको फिल्ममा दयाहाङ र मिरुनासँगै विजय बराल, रोयदीप श्रेष्ठ, रेखा लिम्बु, कमलमणी नेपाल, पुष्कर गुरुङलगायत कलाकारको अभिनय छ।
यसअघि अभिनेता दयाहाङ र मिरुना ‘कबड्डी ४’ मा एकसाथ देखिएका थिए। उक्त फिल्मले नेपालमा सर्वाधिक कमाउने रेकर्ड राखेको थियो।
यो फिल्म आगामी वैशाख १ गतेदेखि प्रदर्शन हुँदैछ। यही मितिमा दयाहाङ राई र प्रकृति श्रेष्ठ अभिनीत फिल्म ‘बिहे पास’ पनि प्रदर्शन हुनेछ।
प्रकाशित मिति: आइतबार, चैत १२, २०७९, ११:३२:००
