पछिल्लो समय डिजिटल कारोबार बढेसँगै अनधिकृत रूपमा व्यक्तिहरूको बैंक खातामा पहुँच पुर्याउँन स्क्यामरहरू सक्रिय रहेको बैंकरहरूले बताएका छन्।
नेपाल फिनटेक अलायन्सले आज (शुक्रबार)बाट सुरू गरेको फिनटेक प्रदर्शनीको दोस्रो श्रृखंलाको उद्घाटन कार्यक्रममा बोल्दै उनीहरूले यस्तो बताएका हुन्।
नेपाल बैंकर्स संघका अध्यक्ष तथा माछापुच्छ्रे बैंकका प्रमुख कार्यकारी अधिकृत सन्तोष कोइरालाले भने, 'हिजो गृहमन्त्रालयमा भएको बैठकमा हामीले जानकारी पायौ, स्क्यामरहरूले ६० सेकेण्डमा तीन वटासम्म बैंकमा पैसा सार्न (ट्रानज्याक्सन गर्न) सकिरहेका रहेछन्, त्यो पनि बंगलादेशको कुनै ठाँउमा बसेर।'
उनले पछिल्लो समय यस्ता घटना बढेपछि मन्त्रालयको समन्वयमा यस्ता घटना निष्प्रभावी बनाउन सबै पक्षको सहभागिता रहने गरेर समूह बनाइएको समेत जानकारी दिए।
उनले अलग्गै प्रसंगमा फिनटेक लगायतका कम्पनीहरू वा अन्यलाई विनाधितो पनि कर्जा लगानी गर्न बैंकहरू तयार रहेको बताए।
यससम्बन्धमा राष्ट्र बैंकले समेत नीतिगत सहजीकरण गर्न लागिरहेको उनले जानकारी गराए।
कार्यक्रममा प्रदर्शनीका प्रवर्द्धक लुपका प्रमुख कार्यकारी अधिकृत साजन शर्माले बैंकहरूले बिना धितो कर्जा लगानी नगर्दा कर्जा लिनसक्ने क्षमताका व्यक्तिहरूलाई नचिनिरहेको बताएका थिए।
शर्माले भने, 'महिनाको ७० हजार कमाउने कुनै पठाओ राइडरले नयाँ बायक किन्न खोज्दा बैंकले उसलाई चिनिरहेको हुँदैन्, बैंकहरूले भौतिक सम्पत्तिलाई मात्रै धितो स्वीकार्ने प्रवृत्तिले यस्ता व्यक्ति मात्रै होइन फिनटेक कम्पनीले पनि कर्जा पाउन सकिरहेका छैनन्।'
वित्तीय प्रविधि व्यवसायीहरूको संस्था फिनटेक एलायन्स नेपालले असोज २३ देखि २५ गतेसम्म ललितपुरको हेरिटेज गार्डेनमा नेपाल फिनटेक प्रदर्शनी आयोजना गर्न लागेको हो।
प्रदर्शनीमा बैंक तथा वित्तीय संस्था, भुक्तानी सेवा, डिजिटल बैंकिङ, वित्तीय प्रविधि तथा कृत्रिम बुद्धिमत्तामा आधारित सेवासहितका प्रविधि प्रदर्शन गरिने आयोजकले जनाएको छ।
प्रदर्शनीमा विभिन्न बैंक तथा वित्तीय संस्थाका सेवा र प्रविधिका साथै नयाँ वित्तीय प्रविधिसम्बन्धी उत्पादन तथा सेवाबारे जानकारी लिन सकिनेछ।
यस क्रममा वित्तीय प्रविधिसम्बन्धी छलफल तथा प्रस्तुति पनि आयोजना गरिनेछ।
आयोजकका अनुसार प्रदर्शनीमा दुईवटा मञ्चमा नयाँ उत्पादन सार्वजनिक गरिनेछ।
साथै, वित्तीय प्रविधि क्षेत्रका विषयमा छलफल, महिला सहभागिता, डिजिटल साक्षरता, कर्जा प्रविधि र वित्तीय समावेशितालगायत विषयमा कार्यक्रम हुनेछन्।
प्रदर्शनीमा ६५ भन्दा बढी स्टल र डिजिटल वित्त तथा साइबर सुरक्षा सचेतनाका लागि दुईवटा एक्पिरियन्स जोन रहनेछन् भने ६ हजारभन्दा बढी आगन्तुकको सहभागिता अपेक्षा गरिएको छ।
सर्वसाधारणका लागि प्रवेश शुल्क दुई सय रूपैयाँ र विद्यार्थीका लागि ५० रूपैयाँ तोकिएको छ।
पछिल्लो समय नेपालमा वित्तीय प्रविधिको प्रयोग बढ्दै गएको र बैंकिङ तथा भुक्तानी प्रणालीमा नयाँ प्रविधिको प्रयोग विस्तार भइरहेका बेला प्रदर्शनी आयोजना गर्न लागिएको हो।
.JPG)
