खाद्य प्रविधि तथा गुण नियन्त्रण विभागले गरेको परीक्षणका क्रममा कैफियत भेटिएपछि फिस्टेल डेरीले आफ्नो एउटा ब्याचको आइसक्रिम बजारबाट फिर्ता गर्ने प्रक्रिया सुरू गरेको छ।
विभागको प्रयोगशाला परीक्षणमा उत्पादन मिति दुई हजार २०८२ साउन १९ गते उल्लेख भएको, ब्याच नम्बर सिओटुको एक हजार मिलिलिटरको नोभा चकलेट आइसक्रिममा गुणस्तर सम्बन्धी समस्या फेला परेको हो।
कम्पनीका अनुसार आइसक्रिम तापक्रमप्रति संवेदनशील हुने भएकाले उत्पादन, ढुवानी, भण्डारण र बिक्री वितरणका क्रममा आवश्यक चिसो तापक्रम अर्थात् कोल्ड चेन कायम हुन नसक्दा ब्याक्टेरियाको वृद्धि भएको हुन सक्ने सम्भावना रहन्छ।
एकपटक पग्लिएको आइसक्रिमलाई पुनः फ्रिजमा राख्दा ब्याक्टेरिया बढ्ने क्रम रोकिए पनि ती जीवाणुहरू पूर्ण रूपमा नष्ट नहुने प्राविधिक तथ्यलाई ध्यानमा राख्दै उक्त ब्याचका उत्पादन फिर्ता लिन लागिएको कम्पनीले स्पष्ट पारेको छ।
उक्त ब्याचबाहेक नोभा ब्रान्डका अन्य कुनै पनि उत्पादनमा गुणस्तरको समस्या नरहेको दाबी कम्पनीले गरेको छ।
यस घटनापछि कम्पनीले आफ्ना उत्पादनहरूको आन्तरिक गुणस्तर परीक्षण, उत्पादन प्रक्रियाको पुनरावलोकन र बजारमा कोल्ड चेनको अनुगमन कार्यलाई थप कडा बनाएको जनाएको छ।
कम्पनीले सम्पूर्ण खुद्रा बिक्रेता तथा वितरण साझेदारहरूलाई तापक्रम संवेदनशील वस्तुहरूको सुरक्षित भण्डारण गर्न र उचित कोल्ड चेन कायम राख्न आग्रह गरेको छ।
साथै, उपभोक्ताहरूलाई पनि बजारबाट सामान खरिद गर्दा उत्पादन मिति र उपभोग गर्न मिल्ने अवधि अनिवार्य रूपमा हेरेर मात्र प्रयोग गर्न अनुरोध गरिएको छ।
