अनर नेपालले अनर ६०० सिरिज सार्वजनिक गरेको छ। उक्त सिरिज अन्तर्गत अनर–६००र अनर–६०० प्रो रहेका छन्।
कम्पनीका अनुसार अत्याधुनिक कृत्रिम बौद्धिकता सुविधा, प्रिमियम डिजाइन र उच्चस्तरीय प्रदर्शनसहित तयार गरिएको यो सिरिजले दैनिक जीवनका सामान्य क्षणलाई पनि विशेष अनुभवमा रूपान्तरण गर्ने लक्ष्य राखेको छ।
सिर्जना, कैद र अनुभवलाई अझ सहज र आकर्षक बनाउने उद्देश्यले यो सिरिज विकास गरिएको कम्पनीको दाबी छ।
अनर–६०० मा उच्च क्षमतायुक्त स्न्यापड्रागन ७ जेन ४ (४ न्यानोमिटर) प्रोसेसर प्रयोग गरिएको छ, जसले दैनिक बहुकार्य प्रयोगमा छिटो र सहज प्रदर्शन दिने बताइएको छ।
यसमा रहेको कृत्रिम बौद्धिकतामा आधारित तस्बिरलाई भिडिओमा रूपान्तरण गर्ने सुविधा मार्फत प्रयोगकर्ताले आफ्ना तस्बिरलाई करिब ५ सेकेन्डको भिडिओ कथामा बदल्न सक्नेछन्।
त्यस्तै, कम उज्यालोमा पनि स्पष्ट फोटो खिच्ने 'नाइट मोड' र फोटोभित्र अनावश्यक वस्तु हटाउने 'इरेजर टुल' जस्ता सुविधा पनि यसमा समावेश छन्।
ठूलो क्षमताको ब्याट्री, छिटो चार्ज हुने प्रविधि तथा उल्टो चार्ज सुविधा सहित यो फोन लामो समयसम्म प्रयोग गर्न मिल्ने गरी डिजाइन गरिएको छ।
कम्पनीका अनुसार अनर–६०० का दुई भेरियन्ट उपलब्ध छन्।
८ जिबी र्याम तथा २५६ जिबी स्टोरेजको मूल्य ८४ हजार ९९९ रुपैयाँ तोकिएको छ भने १२ जिबी र्याम तथा २५६ जिबी स्टोरेजको मूल्य ८९ हजार ९९९ रूपैयाँ रहेको छ।
यो मोडेल खरिद गर्ने ग्राहकले निःशुल्क स्मार्ट घडी र सुरक्षा सेवा सुविधा प्राप्त गर्ने कम्पनीले जनाएको छ।
त्यस्तै, अझ उन्नत संस्करण अनर–६०० प्रोमा उच्च क्षमतायुक्त स्न्यापड्रागन ८ एलिट (३ न्यानोमिटर) प्रोसेसर प्रयोग गरिएको छ, जसले अझ तीव्र प्रतिक्रिया क्षमता र शक्तिशाली कृत्रिम बौद्धिक अनुभव प्रदान गर्ने बताइएको छ।
यस मोडलमा २०० मेगापिक्सल मुख्य क्यामरा (अप्टिकल इमेज स्टेबलाइजेसनसहित), ५० मेगापिक्सेल टेलिफोटो लेन्स (३.५ गुणा अप्टिकल जुम) र १२ मेगापिक्सल अल्ट्रा वाइड क्यामरा सहितको शक्तिशाली क्यामरा सेटअप राखिएको छ, जसले विभिन्न दूरी र अवस्थाका तस्बिरमा उच्च गुणस्तर प्रदान गर्ने कम्पनीको भनाइ छ।
अनर–६०० प्रोमा पनि ठूलो क्षमताको ब्याट्री, छिटो चार्ज हुने सुविधा, वायरलेस चार्ज र उल्टो चार्ज सुविधा उपलब्ध छ।
यो मोडलको मूल्य १ लाख २९ हजार ९९९ रूपैयाँ तोकिएको छ। खरिद गर्ने ग्राहकले स्मार्ट घडी, वायरलेस इयरफोन र अतिरिक्त सुरक्षा सेवा निःशुल्क प्राप्त गर्नेछन्।
कम्पनीका अनुसार अनर–६०० सिरिज सीमित अवधिका लागि नेपालभरका आधिकारिक बिक्री केन्द्रहरूमा उपलब्ध हुने कम्पनीले जनाएको छ।
