एप्पलको पहिलो फोल्डएबल मोबाइल 'आइफोन डुओ' किन्न ग्राहकको आकर्षण बढेको छ। तर माग अनुसार फोन उपलब्ध गराउन कम्पनीलाई कठिन भएको रोयटर्सले जनाएको छ।
माग धान्न नसकेपछि अग्रिम अर्डर खुलेको केही समयमै फोनको डेलिभरी मिति पछि सरेको छ। केही ग्राहकले फोन पाउन सन् २०२७ को जनवरीसम्म कुर्नुपर्ने भएको छ।
रोयटर्सका अनुसार, एप्पलले शुक्रबारदेखि आफ्ना पसलमा आइफोन डुओ बिक्री गर्ने भए पनि सीमित संख्यामा मात्रै उपलब्ध हुने जनाएको छ।
अक्टोबर १६ मा अग्रिम अर्डर खुल्दा सुरूमा अक्टोबर २३ देखि फोन उपलब्ध हुने भनिएको थियो। तर अर्डर खुलेको एक घण्टाभित्रै केही फोनको डेलिभरी मिति सन् २०२७ को जनवरीको अन्तिम सातासम्म पुगेको द भर्जले जनाएको छ।
फोनको मोडल र रङ अनुसार डेलिभरी मिति फरक छ।
एप्पलले पनि फोन सीमित संख्यामा मात्रै उपलब्ध हुने जनाएको छ।
'हामी यो नयाँ उत्पादन सकेसम्म चाँडो ग्राहकको हातमा पुर्याउन कडा मेहनत गरिरहेका छौं,' कम्पनीले भनेको छ।
कम्पनीले कति थान फोनको अर्डर आएको छ वा कति उत्पादन भइरहेको छ भन्ने विवरण भने सार्वजनिक गरेको छैन।
आइफोन डुओको माग बढे पनि उत्पादन बढाउन एप्पललाई चुनौती हुन सक्ने विश्लेषकहरूको भनाइ छ।
रोयटर्सका अनुसार, सामान्य आइफोनभन्दा डुओनको बनावट जटिल छ। फोन खोल्दा र बन्द गर्दा प्रयोग हुने कब्जा (हिन्ज) बनाउन कठिन हुने भएकाले ठूलो संख्यामा उत्पादन गर्न समय लाग्न सक्छ।
तर उत्पादनमा ढिलाइ हुनुको कारण के हो भनेर एप्पलले पुष्टि गरेको छैन।
झन्डै दुई दशकअघि पहिलो आइफोन सार्वजनिक भएयता यसको क्यामरा, स्क्रिन र क्षमतामा निरन्तर सुधार हुँदै आएको छ। फोनको मूल स्वरूप भने उस्तै थियो।
यसपालि एप्पलले पहिलो पटक फोल्ड गर्न मिल्ने आइफोन ल्याएको हो।
आइफोन डुओ किताबजस्तै खोल्न र बन्द गर्न मिल्छ। बन्द गर्दा बाहिर ५.४ इन्चको र खोल्दा भित्र ७.६ इन्चको स्क्रिन देखिन्छ।
ठूलो स्क्रिनमा दुइटा एप एकै पटक चलाउन, कागजात पढ्दै नोट लेख्न र वेबसाइटमा सामग्री तुलना गर्न सकिन्छ।
फोन विभिन्न कोणमा अड्याएर भिडिओ हेर्न वा भिडिओ कल गर्न पनि मिल्छ। एप्पल पेन्सिलको सहायताले स्क्रिनमा नोट लेख्न र चित्र बनाउन सकिन्छ। तर पेन्सिल छुट्टै किन्नुपर्छ र यो हाल उपलब्ध भइसकेको छैन।
आइफोन डुओमा ४८ मेगापिक्सेलका दुई वटा पछाडिका क्यामरा छन्। यसमा छुट्टै टेलिफोटो लेन्स भने छैन।
फोनमा एप्पलको एआई सुविधा र टच आइडी उपलब्ध छन्। यसमा भौतिक सिम राख्न मिल्दैन, इ–सिमबाट मात्रै चल्छ।
अमेरिकामा यसको मूल्य १ हजार ९९९ डलरबाट सुरू हुन्छ। सबैभन्दा महँगो मोडलको मूल्य ३ हजार १९९ डलर छ।
महँगो मूल्यका बाबजुद आइफोन डुओप्रति ग्राहकको चासो धेरै देखिएको छ। तर माग अनुसार उपलब्ध गराउन एप्पलले कति समय लगाउँछ भन्ने स्पष्ट भइसकेको छैन।
