तनहुँको व्यास नगरपालिका–११ घाँसीकुवादेखि भानु नगरपालिका–७ चन्द्रावती जोड्ने बागेश्वरी मोटरमार्गमा सोमबार पहिलो पटक बस पुगेपछि स्थानीयले खुसियालीमा अबिर जात्रा गरेका छन्।
२०४८ सालमा सुरू गरिएको उक्त मोटरमार्गमा पहिलो पटक ना ६ ख ४१३६ नम्बरको बस लगिएपछि बस चालक किशोर गुरुङ, बागेश्वरी मोटर मार्गका संस्थापक अध्यक्ष हरिबहादुर खड्का, मोटरमार्गका अध्यक्ष विवेक भट्टराई लगायतलाई स्थानीयले अबिर जात्रासहित स्वागत गरेका हुन्।
यस मार्गमा सवारी साधन सञ्चालन नहुँदा दमौली आउन घन्टौं पैदल हिँड्नुपर्ने अवस्था रहेको भानु नगरपालिका–६ स्थित बागेश्वरी आमा समूहकी अध्यक्ष विन्दु वाग्लेले बताइन्।
'यस मोटरमार्गमा सवारी साधन नचल्दा हामीलाई बिरामी लिएर अस्पताल जान पनि समस्या थियो,' वाग्लेले भनिन्, 'अब नियमित बस चल्ने भएपछि खुसियालीमा अबिर जात्रासहित स्वागत गरेका हौं।'
चन्द्रावतीदेखि पड्केपसल, बरभञ्ज्याङ, मान्द्रे, ठूलोचौर र मूलपानीका सयौं स्थानीय बाटोमा भेला भई बसलाई अबिर जात्रासहित स्वागत गरेका थिए।
स्थानीयले आफूलाई अबिर जात्रासहित स्वागत गर्दा हौसला मिलेको बसका चालक किशोर गुरुङले बताए।
करिब तीस वर्षअघि खन्न सुरू गरिएको यो मार्गमा नियमित बस सञ्चालन हुनुले स्थानीयलाई ठूलो राहत पुगेको उक्त मोटरमार्गका संस्थापक अध्यक्ष हरिबहादुर खड्काले बताए।
'यस मार्गमा नियमित सवारी साधन नहुँदा प्रशासनिक कामले दमौली जानुपर्दा घन्टौं हिँड्नुपर्ने अवस्था थियो,' खड्काले भने, 'अब भने दैनिक बस सञ्चालन हुने भएपछि भने स्थानीयलाई निकै राहत हुने भयो।'
घाँसीकुवादेखि भानु नगरपालिका–६ पड्के पसलसम्म १४ किलोमिटरसम्म बागेश्वरी मोटर मार्ग पर्छ। तर थप नौ किलोमिटर पक्की सडकखण्ड हुँदै बसलाई दैनिक चन्द्रावतीदेखि दमौली र दमौलीदेखि चन्द्रावतीसम्म लगिने बागेश्वरी मोटरमार्ग उपभोक्ता समितिले जनाएको छ। उक्तमार्गमा बस सञ्चालन हुनुअघि चन्द्रावतीदेखि डुम्रे हुँदै दमौली जानुपर्ने अवस्था थियो।
चन्द्रावतीदेखि डुम्रे हुँदै दमौली पुग्न ३४ किलोमिटर तय गर्नुपर्नेमा यस मार्गबाट २३ किलोमिटरमै दमौली पुगिन्छ। पृथ्वी राजमार्ग बस सञ्चालक समितिसँग समन्वय गरी बस सञ्चालन गरिएको र भाडा दर न्यूनतम तोकिएको उक्त मोटरमार्गका अध्यक्ष विवेक भट्टराईले बताए।
'यस मार्गमा वर्षभरि नै सवारीसाधन सञ्चालन गर्ने गरी व्यवस्था गरेका छौं,' अध्यक्ष भट्टराईले भने, 'बस सञ्चालन गरिएपछि स्थानीयलाई निकै ठूलो राहत भएको छ।'
उक्त मार्गमा दैनिक बस बिहान चन्द्रावतीबाट छुट्ने र मध्याह्न ४ बजेतिर दमौलीबाट फर्किने व्यवस्था गरिएको उनले जानकारी दिए।
