नेपाल जियोटेक्निकल सोसाइटी (एनजिएस) ले जियोटेक्निकल मोडल प्रतियोगिता तथा एनजिएस युवा सिम्पोजियम सन् २०२६ काठमाडौंको पुल्चोक क्याम्पस, इन्जिनियरिङ अध्ययन संस्थानमा सम्पन्न गरेको छ।
यो कार्यक्रम आगामी मार्च १७-१९, २०२७ मा आयोजना हुने अन्तर्राष्ट्रिय सम्मेलन जियोमान्डु २०२७ को प्रमुख तयारीको रूपमा आयोजना गरिएको हो ।
जियोमान्डुको मुख्य विषय पर्वतीय भू-प्रविधि तथा पूर्वाधार विकास उल्लेख गरिएको छ।
प्रतियोगितामा नेपालको जटिल तथा पर्वतीय भूगोलमा पूर्वाधार विकासका चुनौतीलाई सम्बोधन गर्ने नवीन भौतिक तथा अवधारणात्मक मोडलहरू प्रदर्शन गरिएका थिए।
सडक पहिरो, सिन्कहोल, भूकम्पबाट हुने क्षति, जग प्रणाली, पेभमेन्ट, जियोग्रिड प्रयोग, जलविद्युत संरचना, बाढी तथा जल व्यवस्थापन, ढलान स्थिरीकरण र सुरूङ निर्माण जस्ता विविध विषयमा मोडलहरू प्रस्तुत भएका थिए।
यो प्रतियोगितामा चार विश्वविद्यालय, आठ इन्जिनियरिङ कलेज र ११ वटा विद्यार्थी टोलीको उत्साहपूर्ण सहभागिता रहेको थियो।
अधिकांश सहभागी स्नातक तहका इन्जिनियरिङका विद्यार्थी थिए।
प्रतियोगितामा पुल्चोक क्याम्पसले 'सडक ढलानका लागि साइफन ड्रेनेज प्रणालीमार्फत पहिरो न्यूनीकरण' शीर्षकको मोडलसहित प्रथम पुरस्कार हासिल गरेको छ।
यो मोडललाई निर्णायक मण्डलले सडक करिडोरमा पहिरो जोखिम घटाउन अत्यन्त व्यावहारिक र प्रभावकारी ठहर गरेको थियो।
निर्णायक मण्डलका संयोजक तथा सडक विभागका सुपरिटेन्डेन्ट इन्जिनियर सौजन्य नेपालको अध्यक्षतामा भएको मूल्यांकनमा युनिभर्सल इन्जिनियरिङ एन्ड साइन्स कलेजले 'ल्यान्डस्लाइडका लागि स्मार्ट जियोटेक्निकल इन्स्ट्रुमेन्टेसन तथा प्रारम्भिक चेतावनी प्रणाली' मोडेलसहित प्रथम उपविजेता र हिमालय कलेज अफ इन्जिनियरिङले अरनिको राजमार्ग, धुलिखेल, काभ्रेमा कट ढलानको स्थिरता विश्लेषण’ मोडलसहित द्वितीय उपविजेता भएका छन्।
प्रतियोगितासँगै भएको एनजिएस युवा सिम्पोजियम २०२६ ले विद्यार्थी तथा युवा इन्जिनियरहरूका लागि प्राविधिक आदानप्रदान, व्यावसायिक छलफल र युवा सहभागिताको उत्कृष्ट मञ्च प्रदान गरेको थियो।
जियोमान्डु २०२७ का संयोजक डा. ढुण्डीराज पाठकको अध्यक्षतामा भएको यो सत्रमा विशेष युवा प्रवचन तथा विषयगत सम्बोधन भएका थिए।
-1746009348.jpg)
