एमसिए नेपालले पूर्व–पश्चिम राजमार्गको ४० किमि लामो धानखोला–लमही सडक खण्ड स्तरोन्नति कार्य सुरू गरेको छ।
यस सडक स्तरोन्नतिका लागि 'फुल डेप्थ रिक्लेमेशन' र 'सुपरपेभ आस्फाल्ट' प्रयोग गरिएको एमसिए नेपालले जानकारी दिएको छ।
यो पद्धतिले बलियो र टिकाउ सडक निर्माण गर्न मद्दत गर्ने, पुराना आस्फाल्ट पुनःप्रयोग गरी वातावरणीय असर घटाउने र सडक मर्मतलाई दीर्घकालसम्म भरपर्दो र सस्तो बनाउने उल्लेख गरिएको छ।
यस आयोजनाले सडकको दुवैतर्फ सात मिटर चौडा क्यारिजवे र साढे दुई मिटर चौडा सोल्जर निर्माण गरेर यस सडकलाई १२ मिटर चौडा पनि बनाइएको बताइएको छ।
उद्घाटन कार्याक्रममा लुम्बिनी प्रदेशका मुख्यमन्त्री चेतनारायण आचार्यले सडकको राम्रो गुणस्तर र टिकाउपनाको लागि प्रयोग गरिएको प्रविधिप्रति खुसी व्यक्त गरे।
'यो राजमार्गमा हरेक दिन निर्भर रहेको हाम्रो प्रदेश र यहाँका जनताका लागि यो एउटा महत्वपूर्ण अग्रगामी कदम हो। यो सडक खण्डको स्तरोन्नतिले यात्रालाई थप सुरक्षित र भरपर्दो बनाउने मात्र नभई स्थानीय व्यवसायी, किसान तथा उद्यमीहरूका लागि नयाँ अवसरहरू पनि सिर्जना गर्नेछ,' उनले भने।
नेपालका लागि संयुक्त राज्य अमेरिकाका कार्यवाहक राजदूत स्कट अर्बमले धानखोला–लमही सडक खण्ड स्तरोन्नति कार्यले संयुक्त राज्य अमेरिका तथा नेपालबीचको साझेदारीका सन्दर्भमा एउटा महत्वपूर्ण कोशेढुंगा भएको बताए।
'एमसिसी नेपाल कम्प्याक्टमार्फत हामी ढुवानी लागत घटाउने, सुरक्षा वृद्धि गर्ने तथा समुदायहरूलाई बजार र अवसरहरूसँग जोड्ने उच्च गुणस्तरका दिगो पूर्वाधारमा लगानी गर्दैछौँ,' उनले भने, 'यस आयोजनाले नेपालको भविष्यप्रति हाम्रो विश्वास र दिगो आर्थिक वृद्धिका लागि हाम्रो संयुक्त निष्ठालाई प्रतिविम्बित गर्छ।'
एमसिए–नेपालका कार्यकारी निर्देशक खड्ग बहादुर विष्टले सडक खण्ड स्तरोन्नति कार्यको थालनी एमसिसी नेपाल कम्प्याक्ट अन्तर्गतको सडक मर्मत आयोजना कार्यान्वयनका सन्दर्भमा महत्वपूर्ण कदम रहेको बताए।
'एमसिए–नेपाल यो आयोजना प्रभावकारी रूपमा, पारदर्शितापूर्वक तथा उच्चतम गुणस्तरसहित सम्पन्न गर्न प्रतिबद्ध छ,' उनले भने।
सडक मर्मत आयोजना एमसिसी नेपाल कम्प्याक्टको महत्वपूर्ण अंश हो र यसले ढुवानी लागत घटाउने तथा नेपालका सडकको अवस्थामा सुधार ल्याउने उद्देश्य राखेको छ।
