एनइए इन्जिनियरिङ कम्पनीका सर्भेयर प्रणय मगरले तीन-चारवटा एक्स्काभेटर र एउटा ब्रेकर भइदिएको भए माथिल्लो त्रिशूली-३ 'ए' को सुरूङमा फसेकाहरूको उद्धारले अहिलेसम्म सफलता पाइसक्ने बताएका छन्।
भदौ १० गतेको बाढीले प्रभावित रसुवास्थित उक्त जलविद्युत आयोजनाको सुरूङमा फसेकाहरूको उद्धारमा खटिएका मगरले केही समयअघि समाजिक सञ्जाल फेसबुकमार्फत आफ्नो गुनासो व्यक्त गरेका हुन्।
'हेलो माननीयज्यूहरू मेरो एउटा बिन्ती छ। हजुरहरूलाई प्राविधिक चाहिन्छ भने प्राविधिकले भने अनुसार काम गर्नुस्। यदि प्राविधिकले भने अनुसार काम गर्न सक्नुहुन्न भने प्राविधिक नै नबोलाउनुस्। आफ्नो तरिकाले काम गर्नुस्,' उनी लेख्छन्, 'जुन अहिले यो तस्बिर देखिरहनुभएको छ, यो त्रिशूली-३ 'ए' को तस्बिर हो जहाँ हामीजस्तै प्राविधिकहरु टनेल भित्र थुनिरहनुभएको छ।'
उनी अगाडि लेख्छन्, 'आजसम्म हामी उद्धार कार्यमा लागेको ६ दिन बितिसक्यो। अहिलेसम्म कुनै पनि टनेलभित्र जान एक्सिससम्म बनाउन सकिएको छैन। मलाई लाग्छ यो कामका लागि कुनै पनि विशाल प्रविधि हामीलाई चाहिँदैन थियो। यहाँ यदि हामीलाई पहिलो दिनबाटै तीन-चारवटा एक्स्काभेटर र एउटा ब्रेकर भइदिएको भए हामी अहिलेसम्म उद्धार गर्न सफल भइसकेका हुन्थ्यौं।
तीनवटा एक्स्काभेटर दिनरात चल्यो भन्ने खालका समाचार छापिए पनि फिल्डमा एउटा मात्र एक्स्काभेटर चलेको उनले बताएका छन्।
'कृपया योभन्दा ढिला नगरिदिनुस्। जे जे आवश्यक छ ती सामानहरू प्लिज प्लिज प्लिज साइडमा उपलब्ध गराइदिनुस् र यो उद्धार कार्यलाई सहजीकरण गरिदिनुस्। जति सक्दो उदार कार्य सम्पन्न गरेर घरमा कुरिरहनुभएका आफन्तलाई ढुक्क बनाइदिनुहोस सरकार,' उनले भनेका छन्।
