काठमाडौंमा कार्तिक १ गते ‘डिजिटल इकोनोमी कन्क्लेभ, २०२०’ आयोजना हुने भएको छ।
ब्राण्डवर्थ प्रालीले गर्न लागेको कन्क्लेभमा डिजिटल इकोनोमीका सबै सरोकारवालालाई ल्याएर यसको भविष्य, सम्भावना र चुनौतीका बारेमा बृहत छलफल गरिने बताइएको छ।
कार्यक्रम विभिन्न डिजिटल प्लेटफर्ममार्फत् र एपी वान टेलीभिजनमा प्रसारण गरिने भएको छ।
कार्यक्रममा अर्थतन्त्रको डिजीटाइजेसनको सम्भावना, यसको आगामी बाटो, आवश्यक सकारात्मक नीतिगत हस्तक्षेप तथा डिजिटाइजेसनले सिर्जना गर्ने अवसरका बारेमा सरोकारवालाहरु माझ सघन छलफल हुने आयोजक संस्था ब्राण्डवर्थका प्रमुख कार्यकारी अधिकृत (सीइओ) मोहन गजुरेलले जानकारी दिए।
‘सुलभ इन्टरनेट सेवा तथा स्मार्टफोन, बढ्दै गएको इन्टरनेट तथा मोबाइल फोनको उपलब्धताले नेपालको अर्थतन्त्रको डिजीटाइजेसनमा लैजाने अवसर दिएको छ,’ गजुरेलले भने, ‘कोरोना भाइरस महामारी नियन्त्रणका लागि कार्यान्वयनमा ल्याइएको लकडाउनले अर्थतन्त्रमा डिजिटाइजेसनको टड्कारो आवश्यकता औंल्याएको छ।’
कन्क्लेभमा विभिन्न विषयका विज्ञहरुले उनीहरुको हालसम्मको अनुभव, नियमनकारी निकायहरुद्वारा गर्नुपर्ने नीतिगत व्यवस्थाबारे आफ्ना विचार आदानप्रदान गर्ने छन्।
वित्तिय सेवा, भुक्तानी सुविधा, इ–कमर्श सम्बन्धित नीति, नियमनका व्यवस्था, अभ्यास तथा व्यवसायलाई सहजीकरण लगायत विभिन्न विषयमा कन्क्लेभमा छलफल हुने जानकारी दिइएको छ।