प्रिमियर इन्टरनेसनल आइबी कन्टिन्युम स्कुलले जापानको मित्सुआसाही एजुकेसनल फाउन्डेसनअन्तर्गतको आसाहिजुकु सेकेन्डरी स्कुलसँग शैक्षिक तथा सांस्कृतिक सहकार्यका लागि समझदारीपत्र (एमओयू) मा हस्ताक्षर गरेको छ।
यो साझेदारी प्रिमियर इन्टरनेसनल आईबी कन्टिन्युम स्कुलको कुनै अन्तर्राष्ट्रिय शैक्षिक संस्थासँग भएको पहिलो औपचारिक साझेदारी हो।
एमओयूमार्फत नेपाल र जापानका विद्यार्थी तथा शिक्षकबीच शैक्षिक, सांस्कृतिक तथा अनुभव आदानप्रदानका लागि सहकार्यको आधार तयार भएको छ।
'शेपिङ द फ्युचर अफ लर्निङ अक्रस कल्चर्स' भन्ने मूल भावसहित अघि बढाइएको यस साझेदारीले दुवै संस्थाका विद्यार्थी तथा शिक्षकलाई फरक शैक्षिक तथा सांस्कृतिक परिवेश बुझ्ने, नयाँ दृष्टिकोणसँग परिचित हुने र एकअर्काबाट सिक्ने अवसर प्रदान गर्ने लक्ष्य राखेको छ।
साझेदारीअन्तर्गत विद्यार्थी तथा शिक्षकबीच अन्तर्क्रिया, सांस्कृतिक आदानप्रदान, साझा सिकाइ अनुभव तथा विभिन्न शैक्षिक अभ्यासबारे अनुभव आदानप्रदानका कार्यक्रमहरू अघि बढाइने अपेक्षा गरिएको छ।
अन्तर्राष्ट्रिय स्नातक (आइबी) शिक्षाले जिज्ञासा, खोज, आत्मचिन्तन, फरक दृष्टिकोणको सम्मान र विश्वप्रतिको खुला सोचलाई प्राथमिकता दिने भएकाले यो सहकार्य प्रिमियरको शैक्षिक दृष्टिकोणसँग पनि जोडिएको विद्यालयले जनाएको छ।
यसै क्रममा जापानबाट आएको वरिष्ठ शिक्षाविद्हरूको प्रतिनिधिमण्डलले प्रिमियर इन्टरनेसनलको भ्रमणसमेत गरेको थियो।
भ्रमणका क्रममा प्रतिनिधिमण्डलले विद्यालयका कक्षाकोठा, सिकाइका स्थान तथा विद्यार्थीका विभिन्न शैक्षिक र अतिरिक्त क्रियाकलापको अवलोकन गरेको थियो।
प्रतिनिधिमण्डलले विद्यार्थी तथा शिक्षकसँग अन्तरक्रिया गर्दै प्रिमियरको शिक्षण–सिकाइ अभ्यासबारे जानकारी लिनुका साथै जापानको शैक्षिक अनुभव र अभ्याससमेत साझा गरेको थियो।
यसले दुई फरक शैक्षिक परिवेशबीच प्रत्यक्ष अनुभव तथा विचार आदानप्रदानको अवसर सिर्जना गरेको विद्यालयले जनाएको छ।
नेपाल र जापानको सामाजिक, सांस्कृतिक तथा शैक्षिक परिवेश फरक भए पनि विद्यार्थीमा जिज्ञासा, सिक्ने चाहना, फरक दृष्टिकोणको सम्मान र विश्वसँग जोडिने सोच विकास गर्ने विषयमा दुवै संस्थाबीच महत्त्वपूर्ण साझा आधार रहेको छ।
यस साझेदारीले विद्यार्थीलाई कक्षाकोठाको सिकाइभन्दा बाहिर गएर अर्को देशको संस्कृति र जीवनशैली बुझ्ने, फरक दृष्टिकोणसँग परिचित हुने तथा अन्तर्राष्ट्रिय वातावरणमा संवाद र सहकार्य गर्ने अवसर प्रदान गर्ने अपेक्षा गरिएको छ।
त्यस्तै, शिक्षकका लागि पनि फरक शिक्षण अभ्यास र अनुभवबाट सिक्ने तथा आफ्ना अभ्यासलाई नयाँ दृष्टिकोणबाट हेर्ने अवसर सिर्जना हुनेछ।
जापानी प्रतिनिधिमण्डलको प्रिमियर भ्रमणका क्रममा एउटा सामान्य तर अर्थपूर्ण क्षणले पनि यो साझेदारीको भाव झल्काएको थियो।
प्रिमियर इन्टरनेसनल र आसाहिजुकु सेकेन्डरी स्कुलबीचको यो साझेदारीले आगामी दिनमा नेपाल र जापानका विद्यार्थी तथा शिक्षकबीच थप सहकार्य, अनुभव आदानप्रदान र साझा सिकाइका अवसर विस्तार गर्ने अपेक्षा गरिएको छ।
यो सहकार्यसँगै प्रिमियरले विद्यार्थीलाई स्थानीय परिवेशसँग जोडिएको शिक्षा प्रदान गर्दै विश्वसँग संवाद गर्न सक्ने, फरक संस्कृतिलाई बुझ्ने र अन्तर्राष्ट्रिय दृष्टिकोण विकास गर्न सक्ने वातावरण निर्माण गर्ने आफ्नो यात्रालाई थप अगाडि बढाएको बताइएको छ।
-1746009348.jpg)
