नेकपा (एमाले) का अध्यक्ष केपी शर्मा ओलीले ढाँड सेक्नेगरी सरकारले बजेट ल्याउँदा पनि उद्योगी, व्यवसायीको आलोचना गर्न नसकेको बताएका छन्।
नेपाल उद्योग वाणिज्य महासंघ, नेपाल उद्योग परिसंघ लगायतका संगठनहरूले बजेटको आलोचना र विरोध गर्न नसकेको भन्दै उनले आलोचना गरेका हुन्।
‘बजेटमा एकदम बेठिक ढंगका क्रियाकलाप भएका छन् भने ती कुराको उद्योगी-व्यवसायीको हकहितमा खुलेका संगठनले आलोचना गर्नुपर्छ,’ उनले भने, ‘त्यसको आलोचना समूचित ढंगले गर्नुपर्ने थियो। तर, नेपाल उद्योग वाणिज्य महासंघ, नेपाल उद्योग परिसंघ लगायत संगठनले आलोचना गरेको देखिएन।’
उनले थपे, ‘त्यसैले हाम्रो पार्टीको उद्योग, वाणिज्य तथा आपूर्ति विभागले बजेट सिंगो उद्योग-व्यवसायको क्षेत्रलाई हेरेर बजेट ल्याइयो कि सिमित व्यापारीलाई हेरेर ? हामीले ती कमजोरीको आलोचना गर्नुपर्छ।’
उनले आफ्नो हितमा आफूले नबोले अरू नबोल्ने भन्दै उद्योगी-व्यवसायीलाई बोल्न आग्रह गरे।
उनले एक-दुई जना व्यापारी घरानीयालाई हेरेर ल्याएको बजेटले समग्र राष्ट्रिय उद्योग-व्यापारको हित गर्न नसक्ने पनि बताए।
उनले एमालेका सहि नीतिमा सहमत गराउँदै उद्योगी–व्यवसायीलाई आवद्ध गराउने कुरामा भूमिका खेल्नु पर्नेमा पनि जोड दिए।