नेपाली कांग्रेसका नेता कृष्णप्रसाद सिटौलाले १५ औं महाधिवेशनमा सभापति पदको उम्मेदवारका बारेमा अहिले नै छलफल गर्ने बेला नभएको बताएका छन्।
आज जमलमा पत्रकारहरूसँग कुराकानी गर्दै सिटौलाले आमनिर्वाचनपछि महाधिवेशन र उम्मेदवारबारे कुराकानी हुने बताए।
सभापति शेरबहादुर देउवाले केही दिनअघि निवासमा केही पत्रकारहरूसँग कार्यवाहक सभापति पूर्णबहादुर खड्कालाई अब सभापति उम्मेदवार बनाउने भनेको विषयमा पत्रकारहरूले सोधेको प्रश्नमा जबाफ दिँदै सिटौलाले भने, ‘कसलाई उम्मेदवार बनाउने भन्ने कुरा सभापतिजीले हामीहरूसँग भन्नुभएको छैन। अहिले सभापति उम्मेदवार को भनेर छलफल गर्ने बेला नै भएको छैन त सभापतिजीले के कुरा भन्ने हामीहरूलाई?’
महाधिवेशन वैशाखमा तोकेको र फागुनमा आम निर्वाचन रहेकोले त्यसमै केन्द्रित रहनुपर्ने उनको भनाइ थियो।
उनले आफू सभापति पदको उम्मेदवार हो वा होइन भन्ने कुरा महाधिवेशनकै बेला थाहा हुने पनि बताए।
-1746009348.jpg)
