नेपाली कांग्रेसका नेता कृष्णप्रसाद सिटौलाले राष्ट्रिय सभा निर्वाचनमा पार्टीले अन्य दलहरूसँग तालमेल गर्ने बताएका छन्।
यसबारे सभापति शेरबहादुर देउवाको निवासमा आइतबार कार्यवाहक सभापति पूर्णबहादुर खड्काले जानकारी गराएको र आज केन्द्रीय कार्यसम्पादन समिति बैठकमा छलफल गरेर निर्णयमा पुगिने उनले बताए।
काठमाडौंको जमलस्थित एक होटलमा आज पत्रकारहरूसँग कुराकानी गर्दै सिटौलाले पार्टीले राष्ट्रिय सभामा गठबन्धन गरी जाने बताएका हुन्। राष्ट्रिय सभा निर्वाचन माघ ११ गते हुँदैछ।
‘कुन-कुन दलसँग तालमेल गरी जाने भन्ने विषयमा कार्यवाहक सभापतिजी र रमेश लेखकजीले कुराकानी गरिरहनुभएको छ,’ उनले भने, ‘तालमेल गरेपछि कहाँ कहाँ कांग्रेसले उम्मेदवारी दिने पनि तय हुन्छ। आज केन्द्रीय कार्यसम्पादन बैठकमा पनि यसबारे छलफल होला।’
कांग्रेसले एक्लै जित्ने अवस्था नदेखिएकोले तालमेल गर्न लागिएको उनको भनाइ छ।
उनले फागुन २१ को प्रतिनिधि सभा चुनावमा भने कांग्रेसले कसैसँग पनि गठबन्धन नगर्ने बताए।
‘प्रतिनिधि सभा चुनाव चाहिँ हामी एक्लै लड्ने हो,’ सिटौलाले भने, ‘राष्ट्रिय सभामा एक्लै जाँदा परिणाम शून्य आउने खतरा छ, त्यसैले तालमेल गर्न लागिएको हो।’
-1746009348.jpg)
