नेकपा एमाले बाँके–३ मा एकल उम्मेदवार सिफारिस भएका दलबहादुर सुनारविरूद्ध जिल्ला कमिटीमा उजुरी परेको छ।
सुनार गत शनिबार निर्वाचन क्षेत्रीय समन्वय कमिटी बैठकबाट सर्वसम्मत उम्मेदवार सिफारिस भएका थिए।
उक्त क्षेत्रमा अरू सात जना दाबेदार रहेको र सबैको सहमति विपरीत एकल उम्मेदवार भनेर सुनारको नाम माथिल्लो कमिटीमा पठाइएको भन्दै जिल्ला कमिटीमा उजुरी परेको हो।
किस्मतकुमार कक्षपति, चन्द्रबहादुर चौधरी, भक्तबहादुर केसी, अब्दुल करीम खान, लालबहादुर खत्री, पदम धिताल, विवेक लामीछानेले जिल्लामा उजुरी दर्ता गरेका हुन्।
उनीहरूले पार्टी अध्यक्ष केपी शर्मा ओली, महासचिव शंकर पोखरेल, लुम्बिनी प्रदेश अध्यक्ष राधाकृष्ण कँडेल, केन्द्रीय सदस्यहरू शान्ति ढकाल, सूर्य ढकाल, मोहम्मद हारुन, आरती पौडेल, वसन्ती अधिकारीलाई बोधार्थ दिएका छन्।
‘देशमा हुन गइरहेको आगामी संघीय निर्वाचनका लागि हाम्रो पार्टीले तय गरेको उम्मेदवार छनौट कार्यविधि तथा अन्तरपार्टी निर्देशनको उल्लंघन गर्दै मिति २०८२ पुस १९ गते क्षेत्रीय कमिटी बैठकमा बाँके क्षेत्र नम्बर–३ मा हामी दाबेदारहरूको कुनै लिखित तथा मौखिक सहमति नलिई कमरेड दलबहादुर सुनारको एकल नाम सिफारिस गर्ने विधि विपरीत क्षेत्रीय समन्वय कमिटीले निर्णय गरेको भन्ने जानकारी प्राप्त भएकोले पार्टीको विधि विपरीत हामी दाबेदारहरूको अधिकार हनन् गरिएकोले सरोकारवाला कमिटी र नेतृत्वलाई आवश्यक कारबाही एवम् विधि विपरीत गरिएको उक्त उम्मेदवार सिफारिस गर्ने निर्णय बदर गराई विधिपूर्वक सिफारिस गर्ने व्यवस्था मिलाउन निवेदन पेस गरेका छौं,’ उजुरीमा भनिएको छ।
-1746009348.jpg)
