राष्ट्रिय स्वतन्त्र पार्टी (रास्वपा) को समानुपातिक सूचीमा परेकी गोल्डस्टार कम्पनीकी सञ्चालक विदुषी राणाले पाएको जिम्मेवारीलाई निरन्तरता दिने बताएकी छन्।
हुने-खाने वर्गका व्यक्ति पनि समानुपातिक सूचीमा राखिएको भन्दै विरोध भएपछि कतिपयले धमाधम उम्मेदवारी फिर्ता लिएका बेला काठमाडौंका मेयर बालेन शाहको टिमबाट सूचीमा परेकी राणाले भने आफ्नो उम्मेदवारीबारे स्पष्टीकरण दिएकी छन्।
सामाजिक सञ्जाल फेसबुकमा उनले लेखेकी छन्, 'मेरो नाम समानुपातिक सूचीमा परेपछि, म यहाँ किन र कुन उद्देश्यका साथ आएको हुँ भन्ने कुरा स्पष्ट गर्न मेरो दायित्व ठानेकी छु। म समानुपातिक प्रतिनिधित्वलाई अधिकारभन्दा पनि जिम्मेवारीका रूपमा बुझ्छु।'
आफूले यो कुनै व्यक्तिगत राजनीतिक लाभका लागि होइन, स्वदेशी उत्पादन, आयात प्रतिस्थापन, निर्यात प्रवर्द्धन, सीप विकास, अर्थपूर्ण रोजगारी र महिलाको आर्थिक सशक्तिकरणको आवाज संसदमा उठाउन यो जिम्मेवारी स्वीकार गरेको उनको भनाइ छ।
५५ वर्षभन्दा बढी इतिहास बोकेको गोल्डस्टार जुत्ता उद्योगसँग आफू एक दशकभन्दा लामो समयदेखि आबद्ध रहृको उल्लेख गर्दै उनले आफ्नो उद्योगमार्फत तीनदेखि चार हजार महिलाले प्रत्यक्ष रोजगारी पाएको बताएकी छन्।
'यो यात्राले मलाई गहिरो रूपमा बुझाएको छ कि उद्योग केवल व्यापार मात्र होइन, यो देशको भविष्य निर्माण गर्ने आधार हो,' उनले भनेकी छन्, 'स्वदेशी उत्पादन, आयात प्रतिस्थापन, निर्यात प्रवर्द्धन, सीप विकास र महिलाको आर्थिक सशक्तिकरण कुनै नारा होइनन्, यी हामीले दैनिक रूपमा भोगिरहेका यथार्थ हुन्।'
धेरै वर्षदेखि आफूले उद्योग र उत्पादन क्षेत्रले भोग्दै आएका नीतिगत ढिलाइ, कर प्रणाली, व्यापार नीति, ढुवानी, निर्यात, वित्तीय पहुँच र श्रमसम्बन्धी चुनौती निरन्तर रूपमा उठाउँदै आएको उनले दाबी गरेकी छन्।
'यही सन्दर्भमा नगर प्रमुख बालेन्द्र शाहज्यूले मलाई समानुपातिक सूचीमार्फत उद्योग, रोजगारी र अर्थतन्त्रका मुद्दामा अनुभवसहितको आवाज संसदमा अघि बढाउन आग्रह गर्नुभयो,' उनले भनेकी छन्, 'यो आग्रह कुनै राजनीतिक करिअरका लागि होइन; नेपाली उद्योग बाँचोस्, रोजगारी सिर्जना होस्, महिला आर्थिक रूपमा सक्षम बनून् र नेपाल उत्पादनशील बनोस् भन्ने साझा चिन्ताबाट आएको थियो। गहिरो संवाद र बारम्बारको विचार-विमर्शपछि मैले यो जिम्मेवारी स्वीकार गरेकी हुँ।'
-1746009348.jpg)
