परराष्ट्रमन्त्री नारायण खड्काले नेपाल एसपीपीमा सहभागी नहुनेगरी अमेरिकालाई पत्र पठाइसकेको जानकारी दिएका छन्।
शुक्रबार बसेको संसद् बैठकमा उनले सरकारको तर्फबाट जवाफ दिँदै नेपालले साउन ९ गते नै अमेरिकालाई पत्र पठाएको बताएका हुन्।
यही मिति २०७९ साउन ९ अर्थात जुलाई २५, २०२२ का दिन कुटनीतिक माध्यमबाट नेपालले एसपीपीलाई अगाडि नबढाउने निर्णय गरेको लिखित जानकारी अमेरिकी सरकारसमक्ष पठाएको जानकारी गराउन चाहन्छु’, उनले भने।
उनले कूटनीतिक विषय भएकाले केही समय लागेको भन्दै हाम्रो नीतिमा सरकार प्रतिबद्ध रहेको स्पष्ट पार्दै आगामी दिनमा पनि यो नीतिलाई पछ्याउने बताए।
‘आन्तरिक परामर्श आवश्यक भएकाले पत्राचार हुन केही समय लागेको हो’, उनले ढिलो पत्राचार गरेको विषयमा स्पष्ट पारे।
सरकारले असार ६ गते मन्त्रिपरिषद् बैठकबाटै एसपिपीमा सहभागी नहुने निर्णय गरे पनि पत्राचार नगरेको भन्दै आलोचना हुँदै आएको थियो। सांसदहरुले निरन्तर प्रश्न उठाउँदै आएपछि सभामुख अग्नि सापकोटाले यसबारे जानकारी गराउन पनि रुलिङ गरेका थिए।