नेपाली कांग्रेसका प्रवक्ता प्रकाशशरण महतले प्रतिनिधिसभा पुनर्स्थापना माग गर्दै सर्वोच्चमा रिट पेस गर्ने भनेर पार्टीले आधिकारिक रूपमा निर्णय नगरेको बताएका छन्।
पार्टी केन्द्रीय समितिले आम निर्वाचनमा भाग लिने निर्णय मंसिर ६ गते गरेको पनि उनले बताए।
तर आज प्रमुख सचेतक श्यामकुमार घिमिरे, सचेतक सुशीला थिङसहित विघटित प्रतिनिधिसभाका ८ जना सांसदहरूले प्रतिनिधिसभा पुनर्स्थापना माग गर्दै सर्वोच्चमा रिट पेस गरेका छन्।
यस विषयमा सेतोपाटीले प्रवक्ता महतसँग जिज्ञासा राख्दा उनले भने, ‘प्रतिनिधिसभा पुनर्स्थापनाका पक्षमा सर्वोच्चमा रिट लिएर जाने भनेर पार्टीले आधिकारिक रूपमा कुनै निर्णय गरेको छैन। हामीले केन्द्रीय समितिबाट आम निर्वाचनमा भाग लिने निर्णय गरेका हौं।’
उनकाअनुसार कांग्रेसले प्रतिनिधिसभा विघटनलाई असंवैधानिक र अलोकतान्त्रिक भनेको छ।
‘त्यसैले केही साथीहरू सर्वोच्चमा रिट लिएर गएको हुन सक्छ, विघटित प्रतिनिधिसभाका सांसदहरूले पुनर्स्थापनाको माग गर्दै रिट लगेको हुन सक्छ,’ महतले भने, ‘फागुन २१ मा चुनाव हुन्छ कि हुँदैन भन्ने भइरहेका बेला केही साथीहरूले पुनर्स्थापनाको रिट पनि दिइराखौं न त भनेर दिएको हुन सक्छ।’
यस विषयमा प्रमुख सचेतक श्यामकुमार घिमिरेले नेताहरूसँग सरसल्लाहमै प्रतिनिधिसभा पुनर्स्थापना माग गर्दै सर्वोच्चमा रिट दिएको बताएका छन्।
-1746009348.jpg)
