विघटित प्रतिनिधि सभामा नेपाली कांग्रेसका प्रमुख सचेतक श्याम घिमिरे र सचेतक सुशीला थिङले प्रतिनिधि सभा विघटन विरूद्ध सर्वोच्च अदालतमा रिट दायर गरेका छन्।
उनीहरूले रिटमार्फत् प्रतिनिधि सभा पुनर्स्थापना माग गरेका छन्।
घिमिरेले रिट निवेदन नेताहरूको सरसल्लाहमा पेस गरेको बताए। तर उनले को को नेतासँग सल्लाह भयो भन्ने खुलाएनन्।
‘सांसदको कार्यकाल ५ वर्षको हो। असंवैधानिक ढंगले अढाइ वर्षमा हट्नु पर्दा मर्का पर्नेहरू अदालत जानु स्वाभाविक हो,’ घिमिरेले भने, ‘हामी प्रमुख सचेतक र सचेतकका रूपमा धेरै छलफल, विचार विमर्शपछि नेताहरूसँग पनि धेरै सल्लाह गरेर हामी निष्कर्षमा पुगेका हौँ।’
संसदमा प्रमुख सचेतक र सचेतक संसदीय दलको नेताले तोक्ने चलन छ। प्रमुख सचेतक र सचेतकले दलको नेताको निर्देशनमा रहेर काम गर्ने गर्दछन्। विघटित प्रतिनिधि सभामा कांग्रेस संसदीय दलको नेता शेरबहादुर देउवा थिए।
सेतोपाटीले – ‘सभापति शेरबहादुर देउवासँग पनि रिट निवेदनमा जाने विषयमा कुराकानी भएको थियो,’ भनेर घिमिरेलाई प्रश्न गरेको थियो।
जबाफमा उनले भने, ‘सबै नेताहरूसँग कुराकानी भएको छ।’
नेपाली कांग्रेसका महामन्त्रीद्वय गगन थापा र विश्वप्रकाश शर्मा अदालत जाने निर्णयको विपक्षमा थिए। तर घिमिरेले महामन्त्रीहरूले यो निर्णयको विपक्षमा खडा नहुने दाबी गरे।
‘पार्टीले प्रतिनिधि सभा विघटन असंवैधानिक भनेको छ। त्यसलाई संवैधानिक बनाउनका लागि कानुनी ढोका ढकढक्यायौं,’ घिमिरेले भने, ‘सरकार पनि अवैधानिक र संसद विघटन पनि असंवैधानिक छ भन्ने पार्टीको निर्णयमा टेकेर हामी निर्णयमा पुगेका हौं।’
विघटित प्रतिनिधि सभाको मुख्य दुई दल नेपाली कांग्रेस र नेकपा एमालेले प्रमुख सचेतक र सचेतकलाई अदालत पठाएपछि सर्वोच्चमा बहुमत सांसद विघटनको विपक्षमा रहेको सन्देश पुगेको छ। घिमिरेले विघटन विरूद्ध अदालत जान/नजान नेताहरूले कुनै निर्देशन भने नदिएको दाबी गरे।
‘हामीले आफ्नो अधिकार खोज्न त पायौं नि,’ घिमिरेले भने, ‘बिना कारण हामीलाई आधा समयमा हटाइयो। संसद विघटन गर्दा संविधानको कुनै पनि धारा उल्लेख गरिएको छैन। यो असंवैधानिक छ। रिटमा जान हामी आफै अभिप्रेरित भएका हौं। नेताहरूले निर्देशन दिएका छैनन्। तर नेताहरूसँग सरसल्लाह भएको छ।’
रिट निवेदनमा गए पनि उनले निर्वाचन हुने अवस्था भए निर्वाचनबाट पछि नहट्ने दाबी गरे।
तर असंवैधानिक ढंगले प्रतिनिधि सभा विघटन भएको पार्टीको केन्द्रीय समितिको निर्णय अनुरूप अदालत गएको घिमिरेले बताए।
-1765110959.jpg)
-1746009348.jpg)
