नेकपा एमालेका उपाध्यक्ष सुरेन्द्र पाण्डेले पदाधिकारी संख्या वृद्धि गर्ने पक्षमा आफूहरू नरहेको बताएका छन्।
पदाधिकारीमा आकांक्षा राख्ने नेताहरू बढेपछि अध्यक्ष केपी शर्मा ओलीले विधान संशोधनमार्फत् पदाधिकारी संख्या वृद्धि गर्ने चर्चा चलेपछि उपाध्यक्ष पाण्डेले पदाधिकारी संख्या अहिलेकै १५ सदस्यीय रहनुपर्नेमा जोड दिएका हुन्।
भदौमा भएको एमाले विधान महाधिवेशनले एमाले पदाधिकारी संख्या १९ बाट घटाएर १५ मा सीमित गरेकोमा अहिले फेरि अध्यक्ष ओलीले १९ सदस्यीय पदाधिकारी बनाउने गरी विधान संशोधन तयारी गरेको चर्चा एमालेभित्र छ।
‘हामीले विधान महाधिवेशनमा छलफल गरेर पदाधिकारी संख्या १५ मै सीमित गरेको हो, फेरि पदाधिकारी संख्या वृद्धि गरेर १९ पुर्याउने भन्ने सुनिँदैछ, त्यसो गर्न हुँदैन। यदि त्यसो गरिए हामी विरोध गर्छौं,’ बागबजारमा आज पत्रकारहरूसँग कुराकानी गर्दै पाण्डेले भने।
उनले यदि पदाधिकारी संख्या वृद्धि गर्ने हो भने दुई कार्यकाल मात्रै अध्यक्ष बन्न पाउने व्यवस्था पनि लागू गरिनुपर्ने बताएका छन्। एमालेमा एक व्यक्ति दुई कार्यकाल मात्रै अध्यक्ष हुन पाउने भए पनि अध्यक्ष ओलीले त्यो व्यवस्था हटाएका थिए।
मंसिर २७ देखि सुरू हुने ११ औं महाधिवेशनमा ओली तेस्रो कार्यकालका लागि अध्यक्ष पदमा उम्मेदवारी दिने तयारीमा छन्। वरिष्ठ उपाध्यक्ष ईश्वर पोखरेल पनि अध्यक्ष पदमा प्रतिस्पर्धाको तयारीमा छन्।
-1746009348.jpg)
