श्रम संस्कृति पार्टीका प्रमुख सचेतक आरेन राईले प्रधानमन्त्री बालेन शाहले कमजोर जबाफ दिने थाहा पाएको भए आफूले प्रश्न नै नसोध्ने बताएका छन्।
सोमबार विपक्षी दलको बैठकपछि पत्रकारहरूसँग कुराकानी गर्दै उनले प्रधानमन्त्री शाहले ‘नेपालले पनि भारतको जग्गा मिचेको’ भन्ने जबाफ दिने थाहा पाएको भए आफूले प्रश्न नै नगर्ने बताएका हुन्।
‘हाम्रो प्रधानमन्त्रीज्यूबाट प्रश्नको कमजोर जबाफ आउँथ्यो भने म प्रश्न नै सोध्ने थिइनँ,’ उनले भने, ‘ट्याक-ट्याक-ट्याक गरी आउनुभयो। म त उहाँ राम्रै बोल्नुहुन्छ होला भनेको, मैले सोधिहालेँ। तर त्यसको जबाफ यस्तो आयो।’
प्रधानमन्त्री शाहले दिएको अभिव्यक्तिबारे सदनलाई स्पष्ट पार्नुपर्ने पनि बताए।
‘भारत वा छिमेकी मुलुकको संसद कतै पनि नउठेको विषयवस्तु बढी नै विद्वान भएर, जान्ने भएर उठाइदिनु भयो। र छिमेकी मुलुकलाई हाम्रा भूमि दाबी गर्न सहजीकरण गरिदिनुभयो,’ उनले भने, ‘उहाँले सायद भावनामा बहकिएर भन्नुभयो कि कतै जिब्रो चिप्लिएको हो कि, के भयो त। त्यस विषयमा सदनमा प्रष्ट पार्नुपर्छ। किनभने यो सामान्य विषय होइन।’
आइतबार बसेको प्रतिनिधि सभाको बैठकमा प्रधानमन्त्री शाह अकस्मात प्रश्नउत्तर कार्यक्रमका लागि उपस्थित भएका थिए। उनले आफू प्रश्नउत्तरका लागि तयार भएको बताएपछि सभामुख डिपी अर्यालले समय दिएका थिए।
यसै विषयमा राईले लिपुलेक र लिम्पियाधुरा सीमा विवादबारे सोधेका थिए।
त्यसको जबाफमा प्रधानमन्त्री शाहले भनेका थिए,‘यो विषय कूटनीतिक रूपमा टेबल टक... तपाईंहरूलाई एउटा कुरा अचम्म लाग्छ होला। मैले पनि प्रधानमन्त्री भएपछि थाहा पाएँ। भारतले नेपालको जग्गा मात्र होइन, नेपालले पनि भारतको जग्गा धेरै ठाउँमा मिचेको रहेछ।’
