सरकारले निजी अस्पतालमा काम गर्ने चिकित्सकहरूले सरकारी अस्पतालमा काम गर्ने चाहेमा त्यो अवसर प्रदान गर्ने भएको छ।
सोमबार बसेको मन्त्रिपरिषद्को बैठकले काम गर्न चाहने त्यस्ता चिकित्सकहरूलाई तह अनुसार मिलाएर काम गर्न दिने निर्णय गरेको हो।
सरकारका प्रवक्ता युवराज खतिवडाले सरकारी अस्पतालमा काम गर्न आउने निजी क्षेत्रका चिकित्सकले तलब पनि तह अनुसार सरकारी चिकित्सकै अनुसार रहने बताए।
यस्तै, कोरोना उपचार तथा रोकथामका लागि निजी अस्पतालमै काम गर्न चाहे पनि चिकित्सकले पाउने भत्ता सरकारले नै व्यहोर्ने भएको छ।
त्यस्तै, सरकारले कोरोना पहिचानमा खटिने स्वयंसेविकालाई पनि एक पटक खटिएको बापत १५ सय प्रोत्साहन भत्ता दिने निर्णय गरेको छ।
आइतबार कोरोना रोकथाम तथा नियन्त्रण उच्च स्तरीय समन्वय समितिले देशमा रहेका ५० हजार स्वयंसेविकालाई परिचालन गर्ने जनाएको थियो।
यस्तै, सरकारले क्वारेन्टिनको मापदण्डलाई पनि केही परिवर्तन गरेको छ। अब क्वारेन्टिमा रहेका हरेकको १४ दिन बसेपछि र्यापिड डाइगनोस्टिक टेस्ट गरेपछि मात्र घर पठाइने छ। साथै उनीहरूले त्यहाँ पनि अनिवार्य एक साता होम क्वारेन्टिनमा बस्नुपर्ने छ।