सिन्धुपाल्चोकको मेलम्ची बजारमा गएराति गएको पहिरोमा परेर मृत्यु भएका आठ जनाको शव निकालिएको छ।
मेलम्ची नगरपालिका-११ का वडाध्यक्ष रूद्रप्रसाद दुलालका अनुसार पहिरोबाट आठ जनाको शव सोमबार बिहान निकालिएको हो।
‘आठ जनाको शव पहिरोबाट निकालियो,’ उनले सेतोपाटीसँग भने, ‘घाइते एक जनाको हेलिकप्टरबाट उद्धार गरी उपचारका लागि काठमाडौंको ह्याम्स अस्पताल लगिएको छ।’
एअर डाइनेष्टीको हेलिकप्टरबाट घाइतेको उद्धार गरिएको उनले बताए।
मेलम्ची बजारको छेउमा कर्भड हल बनाउन आएका वीरगन्ज र भारतका मजदुरहरू पहिरोमा परेको वडाध्यक्ष दुलालले जानकारी दिए।
ज्यान गुमाउनेहरू सबै पुरूष हुन्।
‘धेरै जना वीरगन्जका हुनुहुन्छ, दुई-तीन जना भारतका पनि हुनुहुन्छ,’ उनले भने।
वडाध्यक्ष दुलालका अनुसार कभर्ड हल बनाउन ती मजदुरहरू २० दिनअघि मेलम्ची बजार आएका थिए।
निर्माणाधीन कभर्ड हलको छेउमा उनीहरू बस्थे।
