सरकारले निषेधज्ञालाई खुकुलो पारे पनि कोरोना संक्रमण भने घटेको छैन। पछिल्लो १० दिनमा मात्र १२ हजार ३ सय ३८ जनामा संक्रमण पुष्टि भएको छ।
अर्थात दैनिक औषत एक हजार २३३ जनामा संक्रमण पुष्टि भएको हो। स्वास्थ्य मन्त्रालयका अनुसार गएको १० दिनमा कुल १ लाख ५ हजार ३५२ जनाको पिसिआर परीक्षण भएको छ।
संक्रमण नघटेपनि सर्वसाधरणको दैनिक जीवनयापन कष्टकर भएको भन्दै सरकारले निषेधाज्ञा खुकुलो बनाएको हो। विज्ञहरूले भने निषेधज्ञा खुकुलो भएसँगै संक्रमण दर बढ्ने भन्दै सतर्कता अपनाउनुपर्ने बताएको छन्।
काठमाडौं उपत्यकासहित बढी जनघनत्व भएका ठाउँमा विशेष सतर्कता अपनाउन विज्ञहरूको सुझाव छ। अहिले पनि दैनिक देखिने संक्रमितहरूमा आधा संक्रमित काठमाडौं उपत्यकाका छन्।
बिहीबार पुष्टि भएका एक हजार २ सय ४६ जनामध्ये उपत्यकाका मात्र ६ सय १८ जना छन्। निषेधाज्ञा खुकुलो भएपनि संक्रमणको जोखिम उतिकै रहेको भन्दै सरकारले जनस्वास्थ्यको मापदण्ड अपाउन अपिल गर्दै आएको छ। कम्तिमा दुई मिटरको भौतिक दूरी कायम गर्ने, नियमित साबुन पानीले हात धुने र स्यानिटाइजरको प्रयोग गर्न सुझाइएको छ।
सरकारले असोज १ गतेबाट लागू हुने गरी लामो दूरीका सार्वजनिक यातायात समेतलाई सञ्चालन गर्न अनुमति दिएको छ। तर सवारीसाधनमा आधा यात्रु मात्र राख्न भनिएको छ। त्यसका लागि सरकारले ५० प्रतिशत बढी भाडा लिन पाउने भनेको छ।
यस्तै होटल व्यवसाय पनि असोज १ गतेबाटै सञ्चालनमा आएका छन्। ती सबै व्यवसायलाई जनस्वास्थ्यका मापदण्ड अपनाएर सेवा सञ्चालन गर्न भनिएको छ।
-1746009348.jpg)
