बिपी कोइराला स्वास्थ्य विज्ञान प्रतिष्ठान धरानका बायोमेट्रिक विभाग प्रमुख डा. निर्मल बरालले आफूले कुनै अनुचित काम नगरेको र आफूमाथि गलत आरोप लगाइएको बताएका छन्।
उनले सन् २०१२ मा प्रवेश परीक्षा भएको बेला आफू लण्डनमा रहेको र त्यसबेला भएको प्रश्नपत्र बाहिरिएको घटनामा आफूले जिम्मेवार नहुने बताए।
‘त्यसबेला छानविन भएको हो, छानविन समितिले ममाथि कुनै चार्ज लगाएको छैन, म दोषी पनि थिइनँ,’ बरालले भने।
जहाँसम्म ६१ वर्षको उमेरहदको प्रसंग छ आफूलाई त्यसबेला अवकाश हुनु केही महिनाअघि चिठी आएको पनि बताए।
तर, त्यसैबेला विश्वविद्यालयको ४२ औं सिनेट बैठकले अवकाशको मितिअघि नै चार वर्ष बढाउने निर्णय भएपछि आफ्नो स्वत: पदावधि बढेको बताए।
‘यो निर्णय उपेन्द्र यादव स्वास्थ्य मन्त्री हुँदा भएको हो, त्यो निर्णय लागू भएको डा. ज्ञानेन्द्र गिरीको पालामा हो,’ बरालले भने।
निर्णय लागू नभएको अवस्थामा आफूले बाहिरै काम गरेको पनि उनले बताए।
‘जब डा. गिरी आउनुभयो र त्यो निर्णय लागू भयो, म मात्र होइन अवकाशमा जान लागेका अरूको पनि पदावधि थप भएको हो,’ उनले भने, ‘यो निर्णय गराउन गिरी सरको कुनै भूमिका छैन, पहिले भएको निर्णय उहाँले लागू मात्र गर्नु भएको हो।’
आफू दोषी नरहेको पुरानो घटना कोट्याएर अहिले आक्षेप लगाउनुमा बिएन्डसीको सम्बन्धनसँग असन्तुष्टहरूले बदनाम गर्न खोजेको बताए।
केही समयअघि बिएण्डसीको सम्बन्धनको विषयमा अध्ययन गर्न काठमाडौं विश्वविद्यालयले झापामा टोली पठाएको थियो। त्यो टोलीका चार सदस्यमध्ये उनी पनि थिए।
‘हामीले बिएन्डसीको हालको अवस्थाबारे बुझ्न दिइएको म्यान्डेटअनुसार काम गरेको हो, हामीले सम्बन्धन दिनु भनेर भनेका थिएनौं, जे थियो त्यही प्रतिवेदन दिएको हो,’ बरालले भने।
बरालसहितको टोलीले प्रतिवेदन दिएपछि काठमाडौं विश्वविद्यालयले बिएन्डसीको सम्बन्धन अघि बढेको जनाउँदै चिकित्सा शिक्षा आयोगलाई सिट तोक्न चिठी लेखेको थियो।
‘२७ वर्षदेखि चिकित्सा क्षेत्रमा काम गरिरहेको छु, प्राध्यापक भएरै काम गरेको डेढ दसक भयो, मलाई पदमा बसेर भ्रष्टाचार गर्नु छैन, बिएन्डसीको प्रकरणसँग असन्तुष्ट जो हुनुहुन्छ उहाँहरूले मलाई अपराधीको संज्ञा दिएर मेरो पेशा र निष्ठालाई दूषित बनाउने काम गर्नुभएको छ,’ बरालले भने, ‘यस्तो आपेक्ष लगाउँदा अत्यन्तै दु:ख लागेको छ।’
सम्बन्धित लेख
बिएन्डसीको स्वार्थमा डुबाइँदै बिपी प्रतिष्ठान!