लोकन्थलीमा यसरी मर्मत हुँदैछ सार्वजनिक स्थलबाट हटाइएका कुर्सीहरू (तस्बिरहरू)

नवीनबाबु गुरूङ

काठमाडौं, माघ १२

काठमाडौं महानगरपालिकाले सडक किनारा, पार्क र नदी करिडोरमा पैदल यात्रीलाई बस्न राखिएका सार्वजनिक कुर्सी निकालेर लोकन्थलीमा मर्मत गरिरहेको छ।

बालेन शाहले मेयरबाट राजीनामा दिनासाथ सार्वजनिक स्थलमा राखिएका कुर्सी हटाइएको भनेर चौतर्फी आलोचना भएको थियो। तर महानगरपालिकाले आइतबार स्पष्टीकरण दिँदै ती कुर्सी मर्मतसम्भार र व्यवस्थापनका लागि झिकिएको बताएको थियो।

लोकन्थलीस्थित एक गोदाममा ती पुराना कुर्सीहरू रंगरोगनको काम भइरहेको छ भने जीर्ण भएकालाई मर्मतसम्भार गर्ने काम भइरहेको महानगरको सार्वजनिक निर्माण विभागका प्रमुख सुरेश राईले जानकारी दिए।

'पहिले पनि पुराना र जीर्ण भएका कुर्सीहरू हामीले लोकन्थलीमा नै मर्मत गर्ने गरेका थियौं,' उनले भने, 'अहिले पनि मर्मतको काम त्यही भइरहेको छ।'

सार्वजनिक स्थलका कुर्सी मर्मतसम्भार गर्ने तेज आरए जेभी कम्पनीले ठेक्का पाएको थियो। सोही बमोजिम कम्पनीले विभिन्‍न स्थानबाट पुराना र जीर्ण भएका कुर्सीहरू ल्याई मर्मत सम्भार गरिरहेको सिभिल इञ्जिनियर सुमन डमरूले बताए।

दिउँसो ठूलो गाडीहरू चलाउन नमिल्ने हुँदा अहिले थोरै संख्यामा काम भइरहेको उनले बताए। त्यसैले शनिबार सबै ठाउँबाछ बेन्च उठाउने तयारी गरिरहेका छौं।

यस्तै उनले सार्वजनिक स्थलहरूबाट कुर्सीहरू हटाउन र सार्न नमिल्ने गरी राखिरहेको उनको भनाइ छ।