ककनी गाउँपालिकाले फोहोर बोकेका गाडीबाट प्रवेश शुल्क उठाउने निर्णय स्थगित गरेको छ।
सर्वोच्च अदालतले दिएको आदेशको कार्यान्वयन गर्ने भन्दै ककनीले काठमाडौंबाट बञ्चरेडाँडा जाने फोहोरका टिपरसँग प्रवेश शुल्क नउठाउने भएको हो।
'ककनी गाउँपालिकाले फोहोरमैला ढुवानी गर्ने सवारीसाधनबाट वातावरण तथा प्राकृतिक स्रोत संरक्षण ऐन २०७७ बमोजिम प्रवेश शुल्क लिन गरेको निर्णयविरूद्ध सम्मानित सर्वोच्च अदालतमा रिट निवेदन दर्ता भएको र सो रिट उपर तत्कालका लागि शुल्क नलिन अन्तरिम आदेश जारी भएको भन्ने बेहोरा जानकारी हुन आएकामा अदालतको आदेश बमोजिम मुद्दाको अन्तिम किनारा नभएसम्म ककनी गाउँपालिकाले फोहोरमैला ढुवानी गर्ने सवारी साधनबाट शुल्क नलिने बेहोरा सबैमा जानकारी गराइन्छ,' पालिकाले जारी गरेको विज्ञप्तिमा भनिएको छ।
फोहोर बोकेका ट्रकबाट प्रवेश शुल्क उठाउने निर्णयविरूद्ध ककनी गाउँपालिका, प्रधानमन्त्री तथा मन्त्रिपरिषद कार्यालय, संघीय मामिला, वन तथा वातावरण र सहरी विकास मन्त्रालयलाई विपक्षी बनाइ हालेको रिटमा सोमबार न्यायाधीश ईश्वर खतिवडाको इजलासले अन्तरिम आदेश दिएको हो।
उक्त रिट फोहोरमैला व्यवस्थापन संघका तर्फबाट धनप्रसाद आचार्यले दर्ता गरेका थिए।
फोहोर र मानिस सँगै नबस्ने भन्दै साउन १ गतेबाट चरणबद्ध आन्दोलनको घोषणा गर्दै स्थानीयले काठमाडौंको फोहोर विसर्जनमा अवरोध गरेका छन्। त्यसका कारण बिहीबारबाट काठमाडौंको फोहोर उठ्नै ठप्प हुने भएको छ।
ककनी गाउँपालिकामा काठमाडौं महानगरपालिका लगायत २३ वटा स्थानीय तहहरूले विगत १८ वर्षदेखि अस्तव्यस्त रूपमा फोहोरमैला फाल्दै आएको सम्बन्धमा पटक-पटक स्थानीयवासीले आन्दोलन गरी विभिन्न मितिमा नेपाल सरकार, काठमाडौं महानगरपालिका लगायतका विभिन्न निकायसँग वार्ता भए पनि समाधान ननिस्किएको गाउँपालिकाले बताएको छ।
'प्रधानमन्त्री पुष्पकमल दाहाल 'प्रचण्ड' ज्यूले सिसडोल, बञ्चरेडाँडामा देखिएको फोहोर व्यवस्थापन समस्या समाधान गर्न पहलकदमी लिई उहाँकै संयोजकत्वमा प्रधानमन्त्री कार्यालय, सिंहदरबारमा उच्चस्तरीय वैठक बसी फोहोरमैला व्यवस्थापनमा देखिएका समस्या समाधान गर्न लिखित रूपमा सहरी विकास मन्त्रालय समेतलाई मिति जेठ २१ गते निर्देशन दिनुभएकोमा सो निर्देशन सम्बन्धित मन्त्रालयले पालना नगरी फोहोरमैला व्यवस्थापनमा देखिएको समस्या समाधान नभएको हुँदा ककनी गाउँपालिका उक्त निर्देशन कार्यान्वयन गरी समस्याको तत्काल समाधान गर्नुपर्छ भन्ने पक्षमा छ,' गाउँपालिका अध्यक्ष सुमन तामाङले हस्ताक्षर गरेको विज्ञप्तिमा भनिएको छ।
