काठमाडौं महानगरपालिकाले माइतीघरमा धर्ना बस्नेहरूका लागि अस्थायी शौचालयको व्यवस्थापन गरेको छ।
बिहीबार माइतीघर मण्डलमा धर्ना बस्ने मानिसहरूलाई मध्यनजर गर्दै अस्थायी शौचालयको व्यवस्थापन गरिएको काठमाडौं- ११ का वडाध्यक्ष हिरालाल तण्डुकारले जानकारी दिए।
उनका अनुसार ५-६ दिनअघि उक्त शौचालयको व्यवस्थापन गरिदिएको हो।
'त्यहाँ धर्ना बसेको मान्छेले शौचालय व्यवस्थापन गर्दिनु पर्यो भनेर भनेका थिए,' उनले भने, 'त्यसैले अहिले महिला र पुरूष दुइटा पोर्टेबल शौचालय राखेका हौं। पछि राम्रो सार्वजनिक शौचालय बनाउने हाम्रो योजना छ।'
शौचालयको फोहोर दिनहुँ निकाल्ने गरेको र आवश्यक पर्ने पानीको पनि व्यवस्थापन गरेको उनले बताए।
केही समयअघि माइतीघर मण्डलमा आन्दोलन गर्न आउनेहरूले शौचालयको व्यवस्थापन नभएको बताएका थिए। शौच जानुपर्ने पिरले खानपिनमा समेत कडाइ गरेको उनीहरूको भनाइ थियो।
यो पनिः
शौचालय पनि जान पाउँदैनन् माइतीघरमा आन्दोलन गर्नेहरू
