जिल्ला कारागार संखुवासभामा दुई कैदीबन्दीको मृत्यु भएको घटनामा प्रहरीले ९ जना कैदीलाई नियन्त्रणमा लिएको छ।
बुधबार दिउँसो आरोपित ९ कैदीलाई नियन्त्रणमा लिएर छुट्टै ठाउँमा राखिएको संखुवासभाका प्रमुख जिल्ला अधिकारी शिवकुमार कार्कीले जानकारी दिए।
कैदीबन्दीहरू संखुवासभा मादी नगरपालिका-५ का १९ वर्षीय विनोद तोलाङी र नुवाकोट ककनी गाउँपालिका-७ का २८ वर्षीय आकाश बलामीको मृत्यु भएको हो। बुधबार बिहान कारागारभित्र अचेत फेला परेका उनीहरूको उपचारको क्रममा मृत्यु भएको हो।
उक्त घटनापछि कैदीबन्दीहरूले नै आरोप लगाएका ९ जनालाई नियन्त्रणमा लिइएको कार्कीले बताए।
‘अरू कैदीबन्दीहरूले आरोप लगाएका ९ जनालाई नियन्त्रणमा लिएर छुट्टै स्थानमा राखेका छौं। भित्र सुरक्षाको चुनौती पनि हुनसक्ने भएकाले छुट्टै स्थानमा राखेका छौं,’ उनले भने, ‘उनीहरूको संलग्नता के-कति थियो भन्ने छानबिनपछि मात्रै थाहा हुन्छ।’
उनका अनुसार दुई जना कैदी बुधबार बिहान २ बजेतिर जेलबाट भाग्ने प्रयास गरेका थिए। उनीहरू शौचालयको झ्यालको रड काटेर भाग्न लागेका थिए।
उनीहरूले भाग्ने प्रयास गरेको थाहा पाएपछि प्रहरीले नियन्त्रणमा लिएर पुन: कारागारभित्र राखेको थियो।
बिहान भने उनीहरू दुबै जना अचेत फेला परेका थिए। त्यसपछि उनीहरूलाई जिल्ला अस्पताल पुर्याइएको थियो।उपचारका क्रममा उनीहरू दुबै जनाको मृत्यु भएको हो।
जिल्ला प्रहरी कार्यालय संखुवासभाका डिएसपी वीरेन्द्र गोदारका अनुसार कैदीहरूले उनीहरूमाथि लात्ती र मुक्काले हिर्काएको देखिएको छ।
सेल भित्र सिसिटिभी पनि नभएकाले क-कसको संलग्नता छ भन्ने छानबिनपछि मात्रै खुल्ने उनले बताए।
‘घटना सेलभित्र भएको देखिन्छ। त्यहाँ सिसिटिभी राखिएको हुँदैन। अहिले नियन्त्रणमा आएका व्यक्तिहरू पनि अरूले आरोप लगाएकाले हो,’ डिएसपी गोदारले भने, ‘कारागारमा विभिन्न समूह हुने भयो। कसले गरेको हो भन्ने अनुसन्धानबाट ढिलो-चाँडो थाहा हुन्छ।’
जिल्ला प्रशासन कार्यालयले सहायक प्रमुख जिल्ला अधिकारी मोहनमणि घिमिरे नेतृत्वको छानबिन समिति बनाएको छ।
मृतक तोलाङी जबरजस्ती करणी मुद्दामा १८ वर्ष र बलामी चोरी मुद्दामा ३ वर्षको कैद भुक्तानी गरिरहेका थिए।
उनीहरू एक वर्षदेखि जिल्ला कारागारमा सजाय काटिरहेका थिए।
हाल कारागारमा १३८ कैदीबन्दी छन्। मृतक दुई कैदी बस्ने कोठामा मात्रै ३८ जना कैदीबन्दी छन्।
