अविरल वर्षाका कारण पहिरो खस्दा पृथ्वी राजमार्ग पूर्णरूपमा अवरूद्ध हुन पुगेको छ।
सोमबार बिहान ६ः४० बजे तनहुँ म्याग्दे गाउँपालिका–६ मौरीबजारमा पहिरो खसेको जिल्ला प्रहरी कार्यालय तनहुँका प्रहरी नायव उपरीक्षक मोहनबहादुर खाँणले जानकारी दिए।
उनका अनुसार अहिले पृथ्वी राजमार्ग पूर्णरूपमा बन्द भएको छ। स्थानीय पालिका, विपद् व्यवस्थापन, प्रहरी तथा सडक विस्तारको लागि काम गरिरहेको चिनियाँ कम्पनीसँग आवश्यक समन्वय गरी पहिरो पन्छाउने काम भइरहेको प्रहरीले जानकारी दिएको छ।
पहिरोले बेनिघाट–आरूघाट सडकखण्ड अवरूद्ध
पहिरोले बेनिघाट-आरूघाट सडकखण्ड अवरूद्ध भएको छ। उक्त सडक खण्डअन्तर्गत पर्ने गोरखाको गण्डकी गाउँपालिका–४ ढावेस्थित दीपा पहरो भन्ने स्थानमा आइतबार साँझपख पहिरो खसेको गण्डकी गाउँपालिकाका अध्यक्ष दीपक तिमिल्सिनाले जानकारी दिए।
पहिरोले बेनिघाट आरूघाट सडकखण्ड पूर्णरूपमा अवरूद्ध भएको उनले बताए। सडक माथिबाट ठूला–ठूला ढुङ्गासहितको पहिरो खसेको स्थानीयले जानकारी दिएको उनले बताए। पहिराले दुईतर्फी सडक अवरूद्ध भएपछि सवारी साधान आउजाउ ठप्प भएका छन्।
सडक अवरूद्ध भएपछि आरूघाट, घाटबेँसी, बेनिघाट हँुदै काठमाण्डौ ओहोर–दोहोर गर्ने सवारी साधन चल्न सकेका छैनन् भने बोलेरोलगायतका निजी तथा भाडाका सवारी साधन पनि पूर्णरूपमा रोकिएकोे उनले बताए। अवरूद्ध सडक हटाउन आवश्यक पहल भइरहेको अध्यक्ष तिमिल्सिनाले जानकारी दिए।
‘ठूलाठूला ढुङ्ग पनि पहिरोसँगै खसेको छ, पहिरो हटाउनका आवश्यक पहल भइरहेको छ’, उनले भने, ‘लगातार वर्ष भइरहेकाले पहिरो हटाउनका लागि समस्या भइरहेको छ।’
उक्त पहिरोका कारण फुजेल, बेनिघाट हुँदै काठमाडौँ चितवनलगायतका सहरमा छुट्ने सवारी साधान पनि अवरूद्ध भएको स्थानीयवासीले बताएका छन।
