आँखा पाक्ने रोग फैलिएपछि कागेश्वरी मनोहरा नगरपालिका भित्रका चार स्कुलले केही दिनका लागि बिदा दिएका छन्।
आँखा पाक्ने रोग विद्यालयमा फैलिन थालेपछि नियन्त्रणका लागि तीन-चार दिन विद्यालय बन्द गरिएको नगर प्रमुख उपेन्द्र कार्कीले बताए।
वडा- ५,८ र ९ मा धेरै रोग फैलिएकाले विद्यालय बन्द गरिएको हो।
आजदेखि वडा-५ का मिलिनियन सेकेण्डरी स्कुल, माउन्ट एभरेष्ट बन्द भएका छन्। वडा-८ मा पर्ने विद्या विकास सेकेन्डरी स्कुल, श्रमशील विद्यापिठले पनि बिदा दिएको छ।
त्यस्तै, वडा-९ मा भिमेश्वर एकेडेमी र ८ को तेज विनायक माध्यमिक विद्यालयले पाँच दिनको बिदापछि मंगलबारदेखि सञ्चालन गरेको प्रमुखले जानकारी दिए।
‘धेरै विद्यार्थी संक्रमित भए रोकथामको लागि विद्यालय बन्द गर्नु भनेर पत्राचार गरेका थियौं,' प्रमुखले भने,'संक्रमित संख्याको आधारमा विद्यालय बन्द गरिएको छ।'
नगरपालिकाले नगरभित्रका विद्यालयलाई साउन २४ गते पत्रचार गरेको थियो। साउन २५ गतेदेखि नै नगरभित्रका विद्यालय बन्द हुने र खुल्ने क्रम भइरहेको नगर प्रमुख कार्कीले बताए।
