ललितनारायण राजवंशीले नेपालको एकदिवसीय टिममा सन् २०१९ मा डेब्यू गरेका थिए।
जनवरी २५, २०१९ मा दुबईमा घरेलु टिम युएई विरूद्धको खेलमा बलरको रूपमा राष्ट्रिय टिममा डेब्यू गरे पनि उनले बलिङ गर्न पाएनन्।
युएईविरुद्ध नेपाल ११३ रनमा अलआउट भएको थियो। युएईले ७ विकेट गुमाएर लक्ष्य पार गरेको खेलमा नेपालले सोमपाल कामी, करण केसी, सन्दीप लामिछाने, पारस खड्का र बसन्त रेग्मीलाई बलिङ गराए पनि डेब्यू बलर ललितलाई मौका दिएन। सो खेलमा ब्याटिङतर्फ भने ललितले १५ खेल खेलर नटआउट २ रन जोडेका थिए।
डेब्यू खेलमै बलिङ गर्न नपाएका २४ वर्षीय स्पिनर ललित त्यसयता नेपाली टिममा लगातार परिरहेका छन्। चोटका कारण केही समय टिम बाहिर रहेका ललितका लागि प्लेइङ-११ मा पर्न भने पहिलो चुनौती बनिरहेको थियो। प्लेइङ-११ परेपछि पनि लगातार विकेट लिन उनले संघर्ष गर्न परिरहेको थियो।
उनले १३ एकदिवसीय खेलमा ११ विकेट लिन सफल भएका थिए। गत डिसेम्बरमा नामिबियाविरुद्ध ४ विकेट लिएर ३६ रन खर्चनु उनको उत्कृष्ट प्रदर्शन थियो। उनले १३ मध्ये ३ खेलमा बलिङ गर्न पाएका थिएनन् भने चार खेलमा बलिङ गरेर पनि विकेटविहीन बन्न परेको थियो।
आइतबार आइसिसी विश्वकप लिग-२ अन्तर्गत युएईविरूद्धको खेलमा भने ललितले अघिल्ला १३ खेलभन्दा उत्कृष्ट प्रदर्शन गर्न सफल भए। १४औं खेलमा उनले ५ विकेट लिन सफल भए।
ललितकै उत्कृष्ट बलिङमा नेपालले युएईमाथि १७७ रनको अहिलेसम्मकै ठूलो जित निकाल्न सफल भयो भने एकदिवसीय मन्यता समेत जोगाउन सफल भयो।
ललितले खेलमा ७.५ ओभर बलिङ गर्दा ५ विकेट लिए भने २० रन मात्र खर्चिए। जसमा उनले २ ओभर मेडन फ्याँकेका थिए। यो उनको करिअरकै उत्कृष्ट बलिङ हो। यसअघि उनको उत्कृष्ट प्रदर्शन ४ विकेट लिएर ३६ रन दिनु थियो।
कीर्तिपुरस्थित त्रिवि मैदानमा टस जितेर पहिले ब्याटिङ गरेको नेपालले २४८ रन जोड्यो। खराब सुरुवात गरे पनि कप्तान रोहितकुमार पौडेलको धैर्यपूर्वक ब्याटिङले नेपालले युएईलाई २४९ रनको चुनौतीपूर्ण लक्ष्य दिएको थियो।
नेपालका लागि महत्वपूर्ण खेलमा जित निकाल्न बलरले उत्कृष्ट खेल्न जरुरी थियो। त्यहिअनुरुपमा कप्तान रोहितले ललितमाथि विश्वास गर्दै पहिलो ओभरमै बल थमाए।
ललितले इनिङ्ग्सको पाँचौं बलमै सफलता हात पार्ने क्रममा युएईका वृत्य अरिविन्दलाई शून्यमा बोल्ड गरे।
पाँचौ ओभरमा आफ्नो दोस्रो स्पेल बलिङ गरेका ललितले मोहमद वासीमलाई कुशल भुर्तेलको हातबाट १ रनमा क्याच गराए। सो ओभर पनि कुनै रन नखर्चिएका ललितले लगातार दोस्रो ओभर मेडन फ्याँकेका थिए।
ललितले युएईका लागि सबैभन्दा बढी रन जोडेका आयान खानलाई पनि २९ रनमा भुर्तेलबाट क्याच गराएका थिए।
जुनइद सिद्धिकीलाई १ रनमा एलबिडब्लूको धरापमा पारेका ललितले आफ्नो पाँचौं तथा टिमका लागि अन्तिम विकेट लिने क्रममा जहूर खानलाई शून्यमा आउट गरे। सन्दीप लामिछानेले पनि २ विकेट लिएको खेलमा युएई ७१ रनमै अलआउट भयो।
करिअरकै उत्कृष्ट बलिङ गरेसँगै ललित प्रफुल्लित छन्।
‘धेरैपछि मौका पाएको थिएँ। प्रशिक्षकले त्यहीअनुसारको योजना बनाउनुभएको थियो। मलाई लाग्छ प्रशिक्षकले यस्तै प्रदर्शनका लागि मलाई राख्नुभएको थियो,’ ललितले हाँस्दै भने।
टिममा स्थान बनाउनका लागि संघर्ष गरेका ललितले सधैं सकारात्मक हुँदै टिममा मौका खोजिरहेका थिए।
उनले भने, ‘आफ्नो दैनिक रुटिनमा नै केन्द्रित थिएँ। अरु एक्स्ट्रा सोचेर निरूत्साहित हुनुभन्दा पनि आफ्नै काममा केन्द्रित थिए।’
नेपाली टिमले पार्टटाइम बलरलाई प्रयोग गरिरहेको थियो। त्यसले गर्दा पनि ललितले मौका पाउन सकेका थिएनन्।
‘हामीले जितिरहेका थियौं। राम्रो प्रदर्शन पनि गरिरहेका थियौं। म हुँदा कम्बिनेसन राम्रो हुन्छ कि भन्ने कहिलेकाँहि फिल त हुन्थ्यो,’ उनको भनाइ छ।
एकदिवसीय मान्यता जोगिएसँगै नेपाली खेलाडीका लागि थप अवसर आउने उनी बताउँछन्।
‘एकदिवसीय मन्यता जोगिएसँगै धेरै फाइदा पुग्छ। सबैले एक्सपोजर पाउँछन्। हामीले बाँकी दुई खेल जित्यौं भने ठूला टिमसँग खेल्ने अवसर पाउछौं। त्यसैले आजको खेल महत्वपूर्ण थियो,’ उनले भने।
युएईमाथि सानदार जितसँगै लिग-२ बाटै जोगियो नेपालको एकदिवसीय मान्यता
सन् २०१८ मार्च १५ मा पहिलोपटक एकदिवसीय मान्यता पाएको नेपालले थप चार वर्षका लागि एकदिवसीय टिमको रुपमा खेल्न पाउने भएको छ।
आइसिसी विश्वकप लिग-२ अन्तर्गत आइतबार कीर्तिपुरस्थित त्रिवि मैदानमा भएको महत्वपूर्ण खेलमा युएईलाई १७७ रनले पराजित गर्दै नेपालले आफ्नो एकदिवसीय मान्यता कायमै राखेको हो। यो नेपालले रनका आधारमा हात पारेको अहिलेसम्मकै ठूलो जित हो। यसअघि नेपालले सन् २०२१ मा पिएनजीमाथि १५१ रनको जित निकालेको थियो।
लिग-२ को शीर्ष पाँच टिमको एकदिवसीय मान्यता कायम रहने अन्तर्राष्ट्रिय क्रिकेट काउन्सिल (आइसिसी) को नियमअनुसार नेपालका लागि आइतबारको खेल महत्वपूर्ण थियो। जुन खेलमा पहिला ब्याटिङ गर्दै खराब सुरुवात गरे पनि नेपालका मध्यक्रमका ब्याटरले धैर्यपूर्वक इनिङ्ग्स सम्हालेका थिए।
बलिङमा भने नेपालले पहिलो ओभरदेखि नै उत्कृष्ट प्रदर्शन गर्दै युएईमाथि लगातार दबाब बढाएको थियो।
आइतबारको जितले नेपालको लिग-२ को शीर्ष पाँचभित्र पर्ने पक्का हुँदा अमेरिकालाई पछि पारेर अंक तालिकाको चौथो स्थानमा समेत उक्लिएको छ। आजको हारले युएईको लिग-२ बाटै एकदिवसीय मान्यता जोगिने सम्भावना सकिएको छ। नेपालको जितले भने अमेरिकाको एकदिवसीय मान्यता लिग-२ बाटै कायम भएको छ।
त्रिवि मैदानमा नेपालले दिएको २४९ रनको लक्ष्य पछ्याएको युएई २२.५ ओभरमा ७१ रनमै अलआउट भयो।
खराब सुरुवात गरेको युएईले ६ ओभरभित्र चार विकेट गुमाएको थियो। नेपालका ललित राजवंशीले युएईका वृत्य अरिवन्दलाई इनिङ्ग्सको पाँचौं बलमा बोल्ड गरेका थिए। यस्तै तेस्रो ओभरको चौथो बलमा दिपेन्द्रसिंह ऐरीले आर्यन लक्रालाई पनि शून्यमै बोल्ड गर्दै नेपाललाई दोस्रो सफलता दिलाए। त्यतिबेला युएईले ६ रन मात्र जोडेको थियो।
ललितले पाँचौं ओभरको चौथो बलमा मोहमद वासीमलाई ८ रनमा क्याच गराए। ललितले पहिलो र पाँचौं ओभर दुवैमा कुनै पनि रन नदिइ मेडन राखे।
५ ओभरमा ८ रन जोडेको युएईले छैटौं ओभरको पहिलो बलमा अर्को विकेट गुमायो। सोमपाल कामीले आशिफ खानलाई ६ रनमा विकेटकिपर आशिफ शेखबाट क्याच गराउँदा नेपालले चार विकेट लिन सफल भयो।
युएईले १४औं ओभरमा पाँचौं विकेट गुमायो। नेपाललाई पाँचौं सफलता दिलाउने क्रममा सन्दीप लामिछानेले १३.४ ओभरमा रोहान मुस्ताफालाई ६ रनमा एलबिडब्लूको धरापमा पारे।
त्रिवि मैदानमा सुरुवातदेखि उत्कृष्ट लयमा देखिएका ललितले २९ रन बनाएर खेलिरहेका आयान खानलाई कुशल भुर्तेलको हातबाट क्याच गराएपछि नेपालले छैटौं विकेट लिएको थियो भने युएईमाथि झन् दबाब थपिएको थियो। सन्दीपले व्यक्तिगत दोस्रो र नेपालका लागि सातौं विकेट लिने क्रममा युएईका जावर फरिदलाई २ रनमा बोल्ड गरे। यस्तै गुल्सन झाले आश्वत भल्थापालाई १४ रनमा दिपेन्द्रबाट क्याच गराए।
बलिङमा नेपालका ललित राजवंशीले ५ विकेट लिए भने सन्दीप लामिछानेले २ विकेट हात पारे। यस्तै सोमपाल कामी, गुल्सन झा र दिपेन्द्रसिंह ऐरीले १-१ विकेट लिए। ललितले ७.५ ओभरमा २ मेडन राख्दा २० रन मात्र दिए।
त्यसअघि टस जितेर पहिले ब्याटिङ गरेको नेपाल ४ बल खेल्न बाँकी छदा २४८ रनमा अलआउट भयो।
नेपालका लागि कप्तान रोहितकुमार पौडेलले ७७ रन जोडे। उनले ११२ बलमा ९ चौका प्रहार गरे। लगातार विकेट गुमेको स्थितिमा मैदान प्रवेश गरेका रोहितले भीम सार्कीसँग चौथो विकेटका लागि ५४ रन र आरिफ शेखसँग पाँचौं विकेटका लागि ८६ रनको साझेदारी गरेका थिए। जसका कारण नेपालको इनिङ उकासिएको थियो।
अर्धशतक प्रहार गरेसँगै रोहित नेपालका लागि सर्वाधिक अर्धशतक प्रहार गर्ने खेलाडी भए। रोहितले नेपालका लागि एक शतकसहित आठ अर्धशतक प्रहार गरेका छन्।
त्यसअघि नेपालका ओपनरद्वय आसिफ शेख शून्य र कुशल भुर्तेल ८ रनमा आउट भएका थिए। नेपालले पाँच ओभर चल्दै गर्दा दुवै ओपनरलाई गुमाएको थियो। ७.१ ओभरमा २२ रनको स्थितिमा तेस्रो विकेट गुमाउने क्रममा नेपालका कुशल मल्ल ९ रनमा पेभिलियन फर्के।
सुरूवातमा दुवै इन्डबाट स्पिनरलाई बलिङ गराएको युएईका आयान खान र आर्यन लक्रा प्रभावशाली देखाएका थिए। आर्यनले आसिफलाई बोल्ड गर्दा आयानले भुर्तेललाई एलबिडब्लूको धरापमा पारेका थिए।
तीन विकेट गएको अवस्थामा धैर्यपूर्वक ब्याटिङ गरेका भीम सार्कीले २९ रन जोडे। उनले ३७ बलमा ४ चौका प्रहार गरे। आरिफ शेखले जोडेको ४३ रन पनि नेपालका लागि महत्वपूर्ण सावित भयो। उनले ५२ बलमा ५ चौका हिर्काए।
गुल्सन झाले ३७ रन जोडे। उनले ३२ बलमा १ चौका र ३ छक्का प्रहार गरे। दिपेन्द्रसिंह ऐरीले आक्रामक ब्याटिङ गर्ने क्रममा १९ बलमा ३४ रन बनाए। उनले १९ बलमा ३ चौका र २ छक्का प्रहार गरे।
सन्दीप लामिछाने र सोमपाल कामी २-२ रनमा आउट भए।
बलिङमा युएईका आयान खान, जहूर खान, जावर फरिद र रोहान मुस्ताफाले २-२ विकेट लिन सफल भए।
शीर्ष ३ मा पर्ने अभियानमा नेपाल
नेपाल, युएई र पिएनजीबीचको यो सिरिज आइसिसी विश्वकप लिग-२ को अन्तिम सिरिज हो। सात टिमबीचको लिग-२ को अन्तिम सिरिजबाट विश्वकप छनोट, एकदिवसीय मान्यता र विश्वकप क्वालिफायर प्लेअफमा पुग्ने टिमको टुंगो लाग्नेछ।
आज जित हात पारेसँगै अब बाँकी रहेका दुई खेलमा जित निकाले नेपालले लिग-२ को शीर्ष तीनमा स्थान बनाउँदै १० देशबीच प्रतिस्पर्धा हुने विश्वकप छनोटमा प्रतिस्पर्धा गर्न पाउनेछ।
सिरिजमा नेपालले अब फागुन २९ मा पिएनजी र चैत २ मा युएईसँग खेल्नेछ।
लिग-२ को शीर्ष तीन टिम विश्वकप छनोटमा पुग्नेछन्। पुछारका चार टिमले क्वालिफायर प्लेअफ खेल्नु पर्नेछ। यस्तै शीर्ष पाँच टिमको एकदिवसीय मान्यता जोगिनेछ।
लिग-२ मा च्याम्पियन बनेको स्कटल्यान्डले सबै ३६ खेलबाट ५० अंक जोड्दा दोस्रो बनेको ओमानको ४४ अंक छ। स्कटल्यान्ड र ओमान विश्वकप छनोट पुगिसकेका छन्।
तेस्रो स्थानको नामिबियाको ३६ खेलबाट ३९ अंक छ। आजको जितले लिग-२ को अंक तालिकामा चौथो स्थानमा उक्लिएको नेपालले ३४ खेलबाट ३६ अंक जोडेको छ। बाँकी दुवै खेल जिते नेपालले नामिबियालाई पछि पार्नेछ।
नेपालको जितले अंक तालिकाको पाँचौं स्थानमा झरेको अमेरिकाको ३६ खेलबाट ३५ अंक छ।
युएई ३४ खेलबाट ३१ अंक जोड्दै छैटौं स्थानमा छ।
आजको हारसँगै युएईको लिग-२ बाटै एकदिवसीय मान्यता जोगाउने अवसर सकिएको छ। अब बाँकी रहेका दुवै खेलमा जित निकाले पनि अमेरिकासँग हेड टु हेडमा पछि रहेको युएई छैटौं स्थाममै सीमित हुनेछ।
नेपालले आज युएईलाई पराजित गरेसँगै अमेरिकाको एकदिवसीय मान्यता भने लिग-२ बाटै जोगिएको छ।
लिग-२ को अंक तालिकाको पुछारमा रहेको पिएनजीको ३४ खेलबाट ११ अंक छ।
लिग-२ बाट एकदिवसीय मान्यता जोगाउने असफल भएका युएई र पिएनजीका लागि विश्वकप क्वालिफायर प्लेअफबाट एकदिवसीय मान्यता जोगाउने अवसर भने हुनेछ।
