नेपाल प्रिमियर लिग (एनपिएल) मा जनकपुर बोल्ट्सलाई पोखरा एभेन्जर्सविरुद्ध जित दिलाउन महत्वपूर्ण योगदान गरेका तृतराज दासले इंग्ल्यान्डका अनुभवी खेलाडी मोइन अलीसँगको साझेदारीबाट आफूले धेरै सिक्ने अवसर पाएको बताएका छन्।
आइतबार कीर्तिपुरस्थित त्रिवि क्रिकेट मैदानमा जनकपुरले पोखरालाई ९ रनले पराजित गर्दा तृतराज प्लेयर अफ द म्याच घोषित भए। उनले जनकपुरको इनिङ्समा सर्वाधिक ६१ रन बनाएका थिए।
जनकपुरले पहिले ब्याटिङ गर्दै २० ओभरमा ७ विकेट गुमाएर १४७ रन बनाएको थियो। टोलीको सुरुवात राम्रो रह्यो। तृतराज र मोइन अलीले पहिलो विकेटका लागि ४७ रनको साझेदारी गरे। मोइनले १६ बलमा २१ रन बनाएर आउट भए पनि तृतराजले एकतर्फबाट इनिङ्स सम्हालिरहे।
उनले सैफ हसनसँग दोस्रो विकेटका लागि ४ रन, कप्तान हरमीत सिंहसँग तेस्रो विकेटका लागि २८ रन र अनिल साहसँग चौथो विकेटका लागि १८ रनको साझेदारी गरे। त्यसपछि अभिषेक तिवारीसँग पाँचौं विकेटका लागि २० रन जोडे।
तृतराजले ५५ बलमा ७ चौका र २ छक्काको मद्दतले ६१ रन बनाए। उनको धैर्यपूर्ण ब्याटिङले जनकपुरलाई प्रतिस्पर्धात्मक योगफलसम्म पुर्याउन महत्वपूर्ण भूमिका खेल्यो।
खेलपछि तृतराजले मोइन अलीसँग ब्याटिङ गर्न पाउँदा खुसी लागेको बताए। मोइनको अनुभव र सुझावले आफूलाई ब्याटिङका क्रममा निकै सहयोग पुगेको उनको भनाइ थियो।
'मोइन अलीजस्तो अनुभवी खेलाडीसँग ब्याटिङ गर्न पाउनु राम्रो अनुभव हो। उहाँले खेलको परिस्थिति बुझेर कसरी शान्त रहने र ब्याटिङ गर्ने भन्नेबारे सुझाव दिनुभयो,' उनले अन्तर्वार्तामा भनेका छन्।
तृतराजका अनुसार ब्याटिङ गर्दा डट बलको दबाब आउने गर्छ। तर, त्यस्तो अवस्थामा आत्तिनुभन्दा खेलको अवस्था बुझेर आवश्यक समयमा बाउन्ड्री प्रहार गर्ने क्षमतामा विश्वास राख्नुपर्ने उनको बुझाइ छ।
उनले आफ्नो प्रदर्शनमा घरेलु क्रिकेटबाट प्राप्त आत्मविश्वास र खेलको परिस्थिति बुझ्ने क्षमताले सहयोग गरेको बताए। टोली व्यवस्थापन तथा सिनियर खेलाडीहरूको सहयोगले पनि आफूलाई मैदानमा शान्त र आत्मविश्वासी भएर खेल्न मद्दत गरेको उनले उल्लेख गरे।
जनकपुरले दिएको १४८ रनको लक्ष्य पछ्याएको पोखरालाई २० ओभरमा ९ विकेट गुमाएर १३८ रनमै रोक्दै जनकपुरले जित निकालेको थियो। पोखराका लागि कुशल भुर्तेलले ३५ रन बनाए पनि अन्य ब्याटर चल्न सकेनन्।
जनकपुरका मोइन अलीले बलिङमा पनि उत्कृष्ट प्रदर्शन गर्दै ४ ओभरमा १३ रन खर्चेर ३ विकेट लिए। यसरी ब्याटिङमा तृतराज र बलिङमा मोइन चम्किँदा जनकपुरले प्रतियोगितामा दोस्रो जित हात पार्न सफल भयो।
तृतराजको अर्धशतक र मोइनको अलराउन्ड प्रदर्शन जनकपुरको जितका मुख्य आधार बने।
-1793552314.png)
