२०औं एसियाली खेलकुदको औपचारिक उदघाटनअघि सुरू भएको महिला भलिबलको प्रतिस्पर्धामा नेपाल लगातार दोस्रो खेलमा पराजित भएको छ।
बिहीबार प्रारम्भिक चरणअन्तर्गत पुल-१ को खेलमा इन्डोनेसियासँग ३-० को सोझो सेटमा पराजित भएपछि नेपाल समूह चरणबाट अघि बढ्न सकेन।
इन्डोनेसियालाई हराएको भए नेपाल अन्तिम आठमा पुग्ने समिकरण थियो।
नेपालले बिहीबार इन्डोनेसियासँग पहिलो सेट २५-१२ ले गुमाएको थियो। दोस्रो सेटमा सुधारिएको प्रदर्शन गरेको नेपाल २५-२१ ले हार्यो। तेस्रो सेटमा पनि २५- १९ ले पराजित भएपछि नेपालको यात्रा सकियो।
यसअघि नेपाललाई बुधबार भएको खेलमा आयोजक जापानले ३-० सेटमा पराजित गरेको थियो।
जापान यो समूहको बलियो टोली हो। जापान छैटौं स्थानमा छ भने नेपाल ६९औं स्थानमा छ। इन्डोनेसिया विश्व वरीयताको ५३औं स्थानमा छ।
२०औं एसियाली खेलकुदमा नेपालले विभिन्न २१ खेलमा प्रतिस्पर्धा गर्दैछ भने १३५ खेलाडी सहभागी हुँदैछन्।
-1746009348.jpg)
