काठमाडौं महानगरपालिकाले हिजोबाट सुरू गरेको किटनाशक औषधि छर्किने कार्यक्रमलाई आज पनि निरन्तरता दिएको छ।
तीन वटा क्षेत्रलाई आधार मानेर सुरू गरेको यो कार्य आज पनि निरन्तर रहेको काठमाडौं महानगरपालिकाका प्रमुख विद्यासुन्दर शाक्यले जानकारी दिएका छन्।
उनले सीमित स्रोत–साधनको समेत उच्चतम सदुपयोग गर्दै अत्यावश्यक ठाउँमा किटनाशक औषधि छर्किने कामलाई निरन्तरता दिइरहेको बताए।
‘सीमित स्रोत–साधनका बीच पनि हामी निरन्तर काम गरिरहेका छौं,’ प्रमुख शाक्यले भने, ‘कामका सिलसिलामा केही कमजोरी भएका छन् भने आम महानगरवासीले दिएको सुझावलाई स्वीकार गर्दै सुधारका प्रयास गर्नेछौं। यो विश्वव्यापी रूपमा फैलिएको महामारीका बेला सबैको साथ र सहयोग अपरिहार्य छ।’
उनले बाटो सफा गर्ने, किटनाशक औषधि छर्किनेलगायतका कामलाई ३२ वटै वडा र अत्यावश्यकसम्म पुर्याउने पनि जानकारी दिए।
नगर प्रहरी महाशाखाका प्रमुख धनपति सापकोटाले पनि हिजोदेखि तीन वटा क्षेत्रलाई आधार मानेर सुरू गरेको उक्त कार्यलाई आज पनि निरन्तरता दिएको बताए।
उनले भने, ‘आज बिहान ४ हजार लिटर क्षमताको जेट मेसिनले मखनबाट सुरू गरेर बसन्तपुर हुँदै लगन पुर्याएको छ। अर्को जेट मिसिन बानेश्वर हुँदै विमानस्थलसम्म पुगेको छ भने तेस्रोले महाराजगञ्ज लगायतका स्थानमा काम गरेको छ।’
उनले थप भने, ‘अब साना सात वटा ट्यांकरसहित महानगर क्षेत्रभित्रका भीडभाड हुने स्थानमा जान्छौं। आज ४ हजार लिटर क्षमताका ३ वटा जेट मेसिनले टेकु, वीर अस्पताल, कालीमाटी फलफुल बजारलगायतका स्थानमा काम गर्नेछन्।’
उनका अनुसार तीन वटा ब्रुमरले बाटो सफा गर्ने कामलाई पनि निरन्तरता दिएका छन्।