पछिल्लो समय सामाजिक संजाल टिकटक लोकप्रियतालाई ध्यान दिँदै एचपी इन्टरटेन्मेन्टको आयोजनामा 'टिकटक स्टार' अनलाइन प्रतिस्पर्धा आयोजना हुने भएको छ।
घरमै बसीबसी देशको विभिन्न स्थानमा रहेका नव प्रतिभालाई अनलाइनबाट प्रतिस्पर्धा गराई विजेतालाई चलचित्रमा काम गर्ने अवसर सहित कार्यक्रम गर्न लागिएको आयोजक संस्थाले बताएको छ।
प्रतिभा भएका तर अवसरवाट वञ्चित प्रतिभाका लागि आफ्नो क्षमता प्रदर्शन गर्ने स्थान 'टिकटक स्टार' बन्ने आयोजक संस्थाका प्रमुख प्रकाश पाठकले बताए।
उनका अनुसार, कोरोना भाइरस महामारीको असामान्य अवस्थालाई मध्यनजर गर्दै अनलाइनको माध्यमबाट कार्यक्रम आयोजना गरिएको हो ।
अनलाइनबाट नै प्रतियोगितामा भाग लिन सकिने र विजेताहरुले चलचित्रका काम गर्ने अवसरका साथै कार, स्कुटर लगायतका अन्य थुप्रै आर्कषक उपहारहरु प्राप्त गर्ने आयोजकले जनाएको छ। कार्यक्रममा भाग लिन चाहने सहभागीले एचपी इन्टरटेन्मेटको अनलाइन पोर्टल गएर दिएको निर्देशन अनुसार फर्म भरी भिडियो पठाउनु पर्नेछ।
यसअघि आयोजक संस्थाले 'स्क्रिप्ट राइटिङ कम्पिटिसन' सम्पन्न गराएको थियो। ह्याप्पी पाठक इन्टरटेन्टमेन्टले निर्माण गरेको चलचित्र 'नेपाल आमा' को छायांकन सकाएको छ। हाल यसको पोस्ट प्रोडक्सनको काम भइरहेको निर्माण कम्पनीले जानकारी दिएको छ।
