२०७२ वैशाख १२ अर्थात् भुइँचालो जाँदाको समय पारेर ‘रातैले बुन्छ’ बोलको गीत सार्वजनिक भएको छ। श्रवण मुकारूङको शब्द, झुमा लिम्बुको स्वर र पुष्पा संगमको संगीत रहेको यो गीत फिल्म ‘दोख’को हो।
अनुप बरालको निर्देशनमा बनेको फिल्म ‘दोख’ले गाउँले परिवेश, जीवनशैली, द्वन्द्व र फुटबललाई विषय बनाएको छ। भुइँचालोकै समयतिर बनाउन सुरू गरिएको फिल्मको छायाकंन भुइँचालो गएपछि केही सयम रोकिएको थियो।
कहिले भुइँचालो, नाकाबन्दी त कहिले कोरोनाका कारण फिल्म प्रदर्शनमा आउने समय धर्किदै गएको छ। त्यसैबीच फिल्मको गीत भने आइतबार युट्युबमार्फत सार्वजनिक भयो।
गीतबारे लेखक श्रवण मुकारूङ भन्छन्, ‘किरात क्षेत्रको लोक लयमा आधार भएर निदेशकले लेख्न भन्नु भएपछि मैले त्यही अनुसार लेखेँ।’
उनका अनुसार गीतको थिमअनुसार सामान्य अवस्थामा बसिरहेकी एकल महिलाको चित्रण शब्दमा उतार्नुपर्थ्यो। ती महिलाको श्रीमान र छोरा छैनन्, कोही जनयुद्ध त कोही विदेश पलायन भएका छन्। उनले गाउँमा सानो भट्टी पसल खोलेकी छन्। त्यहाँ रक्सी खान आउने मान्छेले उनलाई यौन दुर्व्यवहार गर्न खोज्छन्। गीतमा पात्रहरूले गाउँने भन्दा त्यसको भावलाई व्यक्त गर्नुपर्थ्यो।
‘त्यही आधारमा भोजपुर, खोटाङतिरका किराती, राईहरूको सांस्कृतिक लयलाई ढालेको हुँ,’ आफ्नै मूल घर पनि भोजपुर भएका मुकारूङले भने।
गायिका झुमा लिम्बुको बारेमा पनि उनले भने, ‘झुमा यो गीतको लागि एकदम उपयुक्त गायिका हुन्। उनले त्यहाँको संगीतको मर्म बुझेकी छन्, गम्भीरतापूर्वक पूर्वको संगीत र संस्कृतिबारे अध्ययन गरेकी गायिका हुन्, उनी।’