दयाहाङ राई, सौगात मल्ल र तेरिया फौजा मगरको मुख्य अभिनय रहेको फिल्म 'मितज्यू' मा समावेश पहिलो गीत सार्वजनिक गरिएको छ।
आइतबार 'गैराघरे काँइली' बोलको लोकलयको गीत युट्युबमा सार्वजनिक गरिएको हो। यसको भिडिओमा गाउँको सेटिङ देखिन्छ।
भिडिओको केन्द्रमा तेरिया छिन् भने सौगातको समेत नृत्य हेर्न सकिन्छ। दयाहाङ राई, खड्गबहादुर पुन मगरलगायत कलाकारहरूलाई समेत प्रस्तुत गरिएको भिडिओको कोरियोग्राफर मिङ्मा डी. लेप्चा हुन्।
गीतमा श्रीकृष्ण बम मल्ल र मेलिना राईको स्वर छ। गीतको शब्द तथा संगीत पनि गायक मल्लकै हो भने एरेन्ज श्यामश्वेत रसाइलीले गरेका हुन्।
फिल्मका निर्माता जनक घर्ती मगरले फिल्मको कथाले मागेअनुसार नै गीत समावेश गरिएको बताए। उनले भने, 'फिल्मको कथाले जुन गीत मागेको थियो, सोही अनुसार राखेका छौं। यसमा हामीले कुनै कम्प्रमाइज गरेका छैनौैं। स्रोता तथा दर्शकले पनि गीत मन पराउनुहुनेछ भन्ने विश्वास छ।'
ग्रामीण परिवेश र पहाडी पृष्ठभूमिमा आधारित सामाजिक कथामा निर्माण भएको फिल्म अनिल बुढा मगरले निर्देशन गरेका हुन्।
फिल्ममा दयाहाङ राई, सौगात मल्ल, तेरिया फौजा मगर, शिशिर वाङ्देल, पुस्कर गुरूङ, राज थापा, सुवर्ण थापा, अनु थापा, स्मिता लामिछाने, अरूण पुन मगर, पवित्रा खड्का, खड्गबहादुर पुन मगर (खबपु) लगायत कलाकारहरूको अभिनय छ।
'मितज्यू' तेरिया मगरको डेब्यु फिल्म हो। उनी सानो उमेरमै अन्तर्राष्ट्रिय स्तरमै नाम कमाएकी नेपाली कलाकार हुन्। भारतको चर्चित रियालिटी शो डान्स इण्डिया डान्स लिटिल मास्टर सिजन ३ को विजेता बनेपछि तेरिया चर्चामा आएकी थिइन्।
जीएम मुभिज प्रोडक्सनको ब्यानरमा निर्माण 'मितज्यू' मा शिशिर बिशंखेको छायांकन, लोकेश बज्राचार्यको सम्पादन छ।
फिल्म जेठ ८ गतेदेखि प्रदर्शनमा आउनेछ। यसको विरतकमा आरआर फिल्मस् रहेको छ।
-1746009348.jpg)
