फिल्म 'मिरमिरे' को टिम कार्यशाला (वर्कसप) मा जुटेको छ।
दयाहाङ राई र प्रकाश सपुत मुख्य भूमिकामा रहने फिल्मको आइतबारबाट वर्कसप थालिएको निर्देशक यम शेर्पाले जानकारी दिए। 'छायांकनमा सहज होस्। कथा र आफ्नो क्यारेक्टर तथा कलाकारबीच सहज होस् भनेर हामीले वर्कसप गरेका हौं,' निर्देशक शेर्पाले भने। यसले फिल्म छिटो छायांकन गर्न थप सहयोग गर्ने विश्वास रहेको उनले बताए।
कान्तिपुर फिल्म एकेडेमीमा वर्कसप भइरहेको फिल्मको छायांकन शुक्रबारदेखि सुरू गरिनेछ। अधिकांश छायांकन काभ्रेमा हुने निर्माण टिमले जनाएको छ।
यो दयाहाङ र प्रकाशको पहिलो सहकार्य हुनेछ। यमले दयाहाङसँग दोस्रोपटक सहकार्य गर्न लागेका हुन्। यसअघि उनको पहिलो निर्देशन 'कार्साङ' मा पनि दयाहाङले काम गरेका थिए।
यार्सा फिल्म्सको प्रस्तुति रहने यस 'मिरमिरे' मा दयाहाङ, प्रकाशसँगै अभिनेत्री सिर्जना निङलेखु र अभिनेता माओत्से गुरूङको पनि शीर्ष अभिनय रहनेछ।
फिल्मको निर्देशन सँगै कथा पनि यम शेर्पा स्वयंले लेखेका छन्। उनले कथाबारे खुलाएका भने छैनन्।
निमु शेर्पा, छोङ्बा लामा शेर्पा र आङ्छिरिङ शेर्पा निर्माता रहेको 'मिरमिरे' का सह-निर्मातामा गोविन्द बोहरा, सुदीप कुँवर र ईश्वर श्रेष्ठ छन्। कार्यकारी निर्मातामा आरआर फिल्मसका सञ्चालक समेत रहेका फिल्म वितरक रोहित कट्टेल छन्।
'मिरमिरे' २०८२ सालभित्रै रिलिज हुनेछ। प्रदर्शन मिति भने तय भएको छैन।
-1746009348.jpg)
