दयाहाङ राई र मिरूना मगर अभिनीत 'जारी २' तथा अशोक दर्जी अभिनीत 'मन बिनाको धन' प्रदर्शनको दोस्रो सातामा प्रवेश गरेका छन्। कात्तिक २१ गतेदेखि एकसाथ प्रदर्शनमा आएका यी फिल्महरू शुक्रबारदेखि दोस्रो सातामा प्रवेश गरेका हुन्।
उपेन्द्र सुब्बा निर्देशित 'जारी २' ले प्रदर्शनको सुरूआती दुई दिन आक्रामक व्यापार गरेको थियो। दोस्रो सातामा पनि यस फिल्मले उत्साहजनक शोहरू प्राप्त गरेको देखिन्छ। विशेषगरी पूर्वी नेपालका सहरहरूमा फिल्मको व्यापार राम्रो रहेको छ। अन्य स्थानमा पनि यसले सन्तोषजनक व्यापार गरिरहेको निर्माणपक्षको भनाइ छ।
ब्लकबस्टर फिल्म 'जारी' को सिक्वेल भएकाले 'जारी २' प्रति दर्शकको उच्च अपेक्षा थियो। यद्यपि, दर्शक प्रतिक्रिया मिश्रित आउँदा यसले अपेक्षित व्यापार भने गर्न नसकेको विश्लेषण गरिएको छ। यस फिल्ममा दयाहाङ र मिरूनासहित विजय बराल, बुद्धि तामाङलगायतका कलाकारको अभिनय रहेको छ।
त्यसैगरी, टंक बुढाथोकी निर्देशित फिल्म 'मन बिनाको धन' न्यून शोसहित प्रदर्शनमा आएको थियो। निर्माण पक्षका अनुसार यस फिल्मले प्राप्त शोहरूमा राम्रो व्यापार गरेको छ। सुखद अकुपेन्सी देखिएपछि कतिपय हलहरूले शो संख्यामा वृद्धि समेत गरेका थिए।
'मन बिनाको धन' मा बालगायक अशोक दर्जीले शीर्ष भूमिका निर्वाह गरेका छन्। यसमा अशोकसहित सरोज खनाल, नीता ढुंगाना, बुद्धि तामाङलगायतका कलाकारको अभिनय छ।
'जारी २' र 'मन बिनाको धन' दुवै फिल्मको ग्रस व्यापारसम्बन्धी आधिकारिक तथ्यांक चलचित्र विकास बोर्डले आउँदो सोमबार मात्रै सार्वजनिक गर्नेछ।
-1746009348.jpg)
