शुक्रबारदेखि प्रदर्शन तयारीमा रहेको फिल्म 'श्री बुकुरोः द होम कलिङ' को प्रिमियर गरिएको छ।
बुधबार सिटी सेन्टरस्थित बिग मुभिजमा आयोजित प्रिमियरमा फिल्मकर्मीहरू तुलसी घिमिरे, दीपकप्रसाद आचार्य, छविराज ओझा, जयकिशन बस्नेतसहित फिल्म पत्रकार र 'श्री बुकुरो' को टिम उपस्थित थिए।
प्रिमियरपछि निर्देशक तुलसी घिमिरेले फिल्म मन परेको बताए। 'फिल्मले एउटा पैतृक घरलाई ‘बुकुरो’ शब्दमार्फत राम्रोसँग अथ्र्याएको छ। फिल्म हेर्दा मलाई पुरानो घरमा भएको अनुभव भयो। लक्ष्मी जीको अभिनयले मेरी आमालाई सम्झायो', उनले भने।
निर्देशक घिमिरेका अनुसार फिल्ममा मानवीय संवेदनाका स-साना पललाई रमाइलो तरिकाले प्रस्तुत गरिएको छ। सानोमा खोलामा खेल्ने फुपु र भदैको बुढेसकालमा भेट हुनु, लोभी मामाको क्यारेक्टरजस्ता दृश्यहरूले मन छोएको उनले बताए।
निर्माता तथा वितरक छविराज ओझाले पनि 'श्री बुकुरो' उत्कृष्ट बनेको प्रतिक्रिया दिएका छन्।
त्यस्तै अभिनेता तथा निर्देशक जयकिशन बस्नेतले फिल्म हेरिरहँदा कुनै उपन्यास पढिरहेको जस्तो अनुभव भएको सुनाए।
'फिल्ममा कमेडीसँगै पारिवारिक सम्बन्धको भावनालाई रमाइलो तरिकाले प्रस्तुत गरिएको छ', उनले भने।
सुदीप भुपाल सिंहको लेखन तथा निर्देशनमा बनेको फिल्म घर, परिवार र समाजको कथामा आधारित छ। फिल्ममा पुरानो थाकथलो जोगाउनु, पारिवारिक सम्बन्ध, प्रेम जीवनमा असहमति र जीवनका अन्य सामाजिक पक्षलाई समेटिएको छ।
फिल्ममा मुख्य भूमिकामा वरिष्ठ अभिनेत्री लक्ष्मी गिरी छिन्। उनीसँगै आशीर्वाद बी क्षेत्री, निकिता आचार्य, रोशनी कार्की, उत्तम न्यौपाने, रामबाबु रेग्मी, राजन इशान, दीपिका थापा, लय संग्रौला, मोहन निरौला, गीता थापा, सपना श्रेष्ठ, आशिका शाही, दीपक कार्की र रजिना विश्वकर्मालगायत कलाकारहरूले अभिनय गरेका छन्।
रूबी सेन सिंहको लगानी रहेको फिल्म सञ्जय लामा र राजेश श्रेष्ठले छायांकन गरेका हुन्।
'श्री बुकुरोः द होम कलिङ' को सिनेमा हलहरुले अग्रिम टिकट बुकिङ खुलाइसकेका छन्।
-1746009348.jpg)
