चलचित्र विकास बोर्डले नेपाली फिल्महरूको पछिल्लो बक्स अफिस विवरण सार्वजनिक गरेको छ।
बोर्डले 'लालीबजार', 'रोल नं. १', 'आई एम जितबहादुर' र 'जाँड' गरी चार नेपाली फिल्महरूको आइतबारसम्मको कमाइ विवरण सोमबार सार्वजनिक गरेको हो।
विवरणअनुसार फिल्म 'लालीबजार' को ग्रस कमाइ ९ करोड ३२ लाख रूपैयाँ नाघेको छ।
फिल्मले हालसम्म ३ लाख १७ हजार १२ टिकट बिक्री गर्दै ९ करोड ३२ लाख ९ हजार ९२५ रूपैयाँ ग्रस कमाइ गरेको हो। वैशाख २५ गतेदेखि प्रदर्शनमा आएको फिल्मले यसअघि नै ५१ दिन मनाइसकेको छ।
त्यस्तै, फिल्म 'रोल नं. १' को ग्रस कमाइ १ करोड ७४ लाख ८५ हजार ६५८ रूपैयाँ पुगेको छ।
फिल्मले ६९ हजार १६६ टिकट बिक्रीबाट उक्त कमाइ गरेको हो। यो फिल्म जेठ १५ गतेदेखि प्रदर्शनमा आएको थियो।
यस्तै, फिल्म 'आई एम जीतबहादुर' ले ३१ लाख ३६ हजार ११२ रूपैयाँ ग्रस कमाइ गरेको छ। फिल्मको ९ हजार ७४२ टिकट बिक्री भएको विवरणमा उल्लेख छ।
असार १२ गतेदेखि प्रदर्शनमा आएको 'जाँड' को व्यापार निकै कमजोर देखिएको छ। यो फिल्मले १ लाख १६ हजार ६४५ रूपैयाँ मात्र ग्रस कमाएको हो। फिल्मको ५६९ वटा टिकट बिक्री भएको विवरणमा उल्लेख छ।
पछिल्लो साता 'लालीबजार'ले थप ३२ हजार कमायो, 'रोल नं. १' र 'आई एम जीतबहादुर'ले कति कमाए?
फिल्म 'लालीबजार' को अघिल्लो आइतबारसम्मको कमाइ ९ करोड ३१ लाख ७७ हजार ६९० रूपैयाँ थियो। त्यसयता ७ दिनमा फिल्मले ३२ हजार रूपैयाँ मात्र थप कमाएको छ।
त्यस्तै, फिल्म 'रोल नं. १' ले पछिल्लो साता ५ लाख ८९ हजार रूपैयाँ कमाएको छ। अघिल्लो सातासम्म फिल्मको ग्रस कमाइ १ करोड ६८ लाख ९५ हजार ९३८ रूपैयाँ थियो।
त्यसैगरी फिल्म 'आई एम जीतबहादुर' ले पछिल्लो साता २८ हजार ४२० रूपैयाँ कमाएको छ।
यसअघि बक्स अफिस सार्वजनिक हुँदा फिल्मको ग्रस कमाइ ३१ लाख ७ हजार ६९२ रूपैयाँ थियो।
फिल्म 'जाँड' को भने पहिलोपटक बक्स अफिस विवरण सार्वजनिक भएको हो।
यीमध्ये अधिकांश फिल्महरू यतिबेला धेरैजसो हलबाट उत्रिसकेका छन्।
नयाँ नेपाली फिल्म रिलिज नहुनु र यसअघि रिलिज फिल्म हलबाट उत्रिँदा हलहरू विदेशी फिल्मले भरिएका छन्।
