दिवंगत अभिनेता सुनिल थापाको अभिनय रहेको अन्तिम फिल्म 'हिमालयन गोल्ड'को ट्रेलर सार्वजनिक भएको छ।
सर्भाइभल कथामा आधारित यो फिल्म आगामी मंसिर ४ गतेदेखि प्रदर्शनमा आउँदैछ।
नेपालको इतिहास, संस्कृति र मौलिकतालाई विश्वमाझ चिनाउने उद्देश्यले निर्माण गरिएको फिल्ममा सुनिलसँगै परीक्षा लिम्बू, कर्मा शाक्य, राहुल एन. मुखिया र सजन थापाको मुख्य भूमिका छ।
ट्रेलर सार्वजनिक कार्यक्रममा निर्देशक धिराज राजवंशीले फिल्मलाई फरक शैलीमा निर्माण गरिएको बताए। फिल्ममा गीत नरहेको तर पृष्ठभूमि संगीतलाई विशेष महत्व दिइएको उनको भनाइ छ। प्राविधिक पक्षमा अन्तर्राष्ट्रिय टोलीसँग सहकार्य गरिएको पनि उनले बताए।
फिल्म नेपालसँगै भारत, जापान र अस्ट्रेलियालगायतका देशमा नेपाली भाषामै प्रदर्शन गरिने निर्माण पक्षले जनाएको छ। सम्बन्धित देशका दर्शकलाई लक्षित गर्दै सबटाइटल राखिने जनाइएको छ।
निर्देशक राजवंशीका अनुसार भारतीय वितरक कम्पनी 'एए फिल्म्स'ले फिल्म डबिङ गर्ने विकल्प दिए पनि मौलिकता कायम राख्न नेपाली भाषामै प्रदर्शन गर्ने निर्णय गरिएको हो।
'डबिङ गर्दा फिल्मको वास्तविक भाव आउँदैन। हामी नेपालको मौलिकता विश्वमाझ पुर्याउन चाहन्छौं,' उनले भने।
अभिनेत्री परीक्षा लिम्बूले आफ्ना अघिल्ला फिल्मभन्दा 'हिमालयन गोल्ड' फरक रहेको बताइन्। उनका अनुसार फिल्मले जीवनमा सबै कुरा गुमाएको मानिसको बाँच्नका लागि गरिने संघर्षको कथा प्रस्तुत गर्छ।
'यसअघि मैले सामाजिक, पारिवारिक र प्रेमकथामा आधारित फिल्ममा काम गरेकी थिएँ। यो भने नितान्त फरक कथा हो,' उनले भनिन्, 'नेपालमा महिलाप्रधान फिल्म कम बन्ने भएकाले यसमा काम गर्न पाउनु मेरा लागि विशेष अवसर हो।'
अभिनेता कर्मा शाक्यले पनि फिल्मको कथा नियमित रूपमा बन्ने नेपाली फिल्मभन्दा फरक रहेको बताए। महिलालाई मुख्य पात्र बनाइएका फिल्मको बजार विस्तार हुनुपर्नेमा उनले जोड दिए।
'हिमालयन गोल्ड'लाई भारतभर वितरण गर्ने जिम्मा ‘एए फिल्म्स’ले लिएको छ। कम्पनीका संस्थापक अनिल थडानीसँग यससम्बन्धी सम्झौता भइसकेको निर्माण पक्षले जनाएको छ। उक्त कम्पनीले यसअघि 'बाहुबली', 'आरआरआर', 'केजिएफ: च्याप्टर २' र 'पुष्पा'जस्ता चर्चित भारतीय चलचित्र वितरण गरिसकेको छ।
फिल्मका निर्माता तथा वितरक नकिम उद्दिनले अन्तर्राष्ट्रिय बजारमा फिल्मको राम्रो सम्भावना रहेको बताए। भारतसँगै जापानलगायतका देशबाट पनि सकारात्मक प्रतिक्रिया प्राप्त भइरहेको उनको भनाइ छ।
'यस्ता फिल्मले अन्तर्राष्ट्रिय बजार पाए नेपाली फिल्म उद्योगलाई थप फाइदा पुग्छ,' उनले भने।
