विगत १३ वर्षदेखि बालबालिका सम्बन्धी किताब प्रकाशन गर्ने कथालयबाट ‘सुपरमुले कसरी पृथ्वीलाई बचाइन् ?’ र 'म ढिलो भएँ' शीर्षकका बालकथा संग्रह प्रकाशित भएका छन्।
यी दुई पुस्तक अन्तर्राष्ट्रिय साक्षरता दिवसकाे शुभकामनासहित बिहिबार प्रकाशित गरिएको कथालयकी प्रमुख कार्यकारी अधिकृत सुनिती अमात्यले बताइन्।
सुपरमु नयाँ कुरा सिक्न चाहने पढेलेखेकी गाई हुन्। एक दिन उनले अचम्मको समाचार पढ्छिन्– चाँडै नै एउटा ठूलो उल्का पृथ्वीको नजिकबाट जाँदैछ।
उनलाई यो कुरा पढेर अब के हुने हो भन्ने चिन्ता लाग्छ। त्यो उल्काले पृथ्वीलाई ठक्कर दिन लागेको थाहा पाएपछि उनको चिन्ता झनै बढ्छ। तर सुपरमु सजिलै हार मान्ने गाई हैनन्। उनले इन्टरनेटबाट साथीहरुसँग यो समस्याबारे छलफल गर्छिन्। उनीहरु सबै मिलेर एउटा उपाय निकाल्छन्।
त्यो उपाय के होला? सुपरमुले र उनका साथीहरुले पृथ्वीलाई कसरी बचाए होलान् ?
पाठकमा यस्तै प्रश्न र जिज्ञासा जगाउने रमाइलो कथाका चित्रहरु पनि आकर्षक छन्। यसले कथालाई अझै रोचक बनाएको छ। लेखक एर्दोआनले नै बनाएका चित्र हेरेर मात्रै पनि बालबालिकाले कथाबारे धेरै कुरा थाहा पाउन सक्छन्। किताब आठ–नौ वर्षका बालबालिका लक्षित छ।
अर्को पुस्तक 'म ढिलो भएँ' (आइ एम लेट फर स्कुल) बालबालिकाका लागि लेखिएको उनको अत्यन्तै चर्चित शृंखला हो। हालसम्म यो शृंखला ५३ लाख प्रति बिक्री भइसकेको छ। यो किताब अंग्रेजी, चाइनिज, बोस्नियन, अजरबैजानी, अरबिक, मलयामी आदि भाषामा प्रकाशित भइसकेको छ।
म्याभी बुलुथ किताबको मूल प्रकाशक हो। टर्कीमा १९८० मा स्थापना भएको माभी बुलुथ बालबालिका केन्द्रित किताब निकाल्ने प्रकाशन गृह हो। यसको स्थापना लेखक एर्दोआनले गरेका हुन्।
बालसाहित्यमा करिब ७० किताब लेखिसकेका उनको १० लाखभन्दा बढी किताब बिक्री भइसकेका छन्। उनका प्रायः किताबमा उनले बनाएका चित्रहरु प्रयोग भएका छन्।
सन् १९८० मा उनले लेखेको पहिलो किताब ‘पान एन्ड हिज फ्लावर’ ले बेस्ट पिक्चर बुक अवार्ड पाउन सफल भएको थियो। त्यसयता हरेक वर्षजस्तै उनी उत्कृष्ट लेखक वा बालसाहित्यको सूचीमा पर्दै आएका छन्।
टर्कीका उत्कृष्ट किताब र लेखकको सूचीमा पटक पटक पर्दै आएका उनले कयौं राष्टिय पुरस्कार जितेका छन्।
उनी बाल साहित्यकै विश्व प्रतिष्ठित एस्ट्रिड लिन्डग्रेन मेमोरियल अवार्ड (एलएमए अवार्ड) का लागि २०१६ देखि २०१९ सम्म लगातार मनोनित भएका थिए।
मेसिडोनियन र नेपाली भाषामा प्रकाशित ‘सुपरमुले कसरी पृथ्वीलाई बचाइन् ?’ ८ हजारप्रति बिक्री भइसकेको छ।
एर्दोआनको दुवै पुस्तक नेपालीमा भिक्टर प्रधानले अनुवाद गरेका हुन्।
३४ पृष्ठको ‘सुपरमुले कसरी पृथ्वीलाई बचाइन् ?’ किताबको मूल्य २५० रुपैयाँ र २० पृष्ठको 'म ढिलो भएँ' को मूल्य १५० रुपैयाँ तोकिएको छ।
