चैत २२ गतेदेखि प्रदर्शनमा आउने तयारीमा रहेको फिल्म 'वसन्त' को गीत युट्युब ट्रेन्डिङको शीर्ष स्थानमा उक्लिएको छ।
फिल्मको १० दिनअघि सार्वजनिक ‘बिना स्वादैको’ गीत राम्रो भ्युजसहित युट्युब ट्रेन्डिङमा संगीत खण्डतर्फ पहिलो नम्बरमा प्रवेश गरेको हो।
समाचार तयार पार्दासम्म देवेन्द्र बब्लु (दि फिरन्ते)को स्वर रहेको यो गीतलाई १२ लाखभन्दा बढीपटक हेरिएको छ। अधिकांश दर्शकले गीतको तारिफ गरेका छन्।
यो गीतमा शब्द र संगीत गायक तथा निर्देशक प्रकाश सपुत र देवेन्द्र बब्लुको छ भने संगीत संयोजन योगेश काजी शाहको छ। हरर रोमान्टिक थिममा तयार पारिएको गीतको भिडिओमा एक जोडीको अन्तरजातिय प्रेम पश्चात परिवारले उनीहरूको मोहनी फुकाउन गर्ने विभिन्न घटनालाई देखाइएको छ।
भिडिओमा फिल्मका मुख्य कलाकारहरू प्रभात पाल ठकुरी, श्री शिभान्सी, गायक देवेन्द्र बब्लुसहित मुख्य सहायक निर्देशक सुनिल विक तथा कलाकार विशाल पहारी प्रस्तुत छन्।
प्रकाश सपुत निर्देशित फिल्ममा उनीसहित स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे, खड्क बहादुर पुन (खबपु), अनुप बराल, कमलमणी नेपाल, प्रकाश घिमिरे लगायत कलाकारहरूको अभिनय छ।
गलबन्दी प्रोडक्सनको प्रस्तुतिमा सामाजिक कथामा बनेको 'वसन्त' को निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र विरेन्द्र नारायण श्रेष्ठ छन्।
