जंगली जनावरको आक्रमणबाट दुई जनाको मृत्यु भएपछि स्थानीयले अवरूद्ध गरेको सुर्खेत-नेपालगञ्ज सडक खुलेको छ।
सोमबार बिहान ११ बजेदेखि स्थानीयले सडक अवरूद्ध गरी आन्दोलित थिए।
स्थानीय र प्रशासन बीचको छलफलपछि सडक खुलेको जिल्ला प्रहरी कार्यालय सुर्खेतका प्रवक्ता प्रहरी नायब उपरीक्षक सुरज कार्कीकले बताए।
मंगलबार राष्ट्रिय निकुञ्जको टोलीसँग वार्ता गर्ने सहमति भएको छ।
आइतबार बेलुका भेरीगंगा–५ गेरवानीका रामबहादुर चन्द र कवी ओलीको जनावरले आक्रमण गरेको अवस्थामा शव फेला परेको थियो। बर्दिया राष्ट्रिय निकुञ्जको मध्यवर्ती क्षेत्रमा घाँस काट्न गएका उनीहरू मृत फेला परेका थिए।
स्थानीयले मानवीय क्षति पुर्याउने जंगली जनावरलाई नियन्त्रणमा लिनुपर्ने, मृतकका परिवारलाई उचित क्षतिपूर्ति दिनुपर्ने तथा आफ्नो नजिक पर्ने राष्ट्रिय निकुञ्जको मध्यवर्ती क्षेत्र खारेज गर्नुपर्ने माग राख्दै आन्दोलन गरेका थिए।
