चर्च ब्वाइज क्लब ए डिभिजन लिगको उपाधि नजिक पुगेको छ।
शनिबार जावलाखेल युथ क्लबलाई ३-० गोलले पराजित गरेसँगै चर्च ब्वाइज उपाधि नजिक पुगेको हो।
अंक तालिकाको शीर्ष स्थानमा रहेको चर्च ब्वाइजले बाँकी रहेका दुई खेल जिते उपाधि जित्नेछ।
दोस्रो स्थानको मछिन्द्र क्लबले अंक गुमाएको अवस्थामा चर्च व्बाइजलाई एक जित काफी हुनेछ।
शनिबार जावलाखेलविरुद्ध चर्च ब्वाइजका अन्जन विष्टले पहिलो हाफको इन्जुरी टाइममा पहिलो गोल गरे।
आसिस चौधरीले ८८ र दोस्रो हाफको इन्जुरी टाइममा गरी दुई गोल थपे।
हारसँगै जावलाखेलको उपाधि सम्भावना सकिएको छ।
अंक तालिकामा चर्च ब्वाइज २४ खेलबाट ४४ अंक जोड्दै शीर्ष स्थानमा छ। दोस्रो स्थानको मछिन्द्रको २३ खेलबाट ३९ अंक र तेस्रो स्थानको जावलाखेलको २४ खेलबाट३ ३७ अंक छ।
