अपर सोलु हाइड्रो इलेक्ट्रिक कम्पनीले आगामी असार २० गतदेखि सर्वसाधारणको लागि आइपिओ खुला गर्ने भएको छ। कम्पनीले सर्वसाधारणको लागि १९ लाख ५७ हजार ५ सय कित्ता सेयर निष्कासन गर्ने भएको हो।
इच्छुक आवेदकहरूले असार २० गतेदेखि असार २३ गतेसम्म आइपिओ भर्न सक्नेछन्। माग बमोजिमको आवेदन नपरेमा भने ढिलोमा साउन २ गतेसम्म आवेदन दिन सकिने कम्पनीले बताएको छ। आवेदकहरूले न्यूनतम १० कित्तादेखि अधिकतम एक लाख कित्तासम्मको लागि आवेदन दिन मिल्छ।
जारी गरिएको सेयर कित्तामध्ये कम्पनीले २ प्रतिशत अर्थात् ३९ हजार १५० कित्ता सेयर कर्मचारीहरूको लागि र ५ प्रतिशत अर्थात् ९७ हजार ८७५ कित्ता सेयर सामुहिक लगानी कोषको लागि छुट्याएको छ। यीबाहेक बाँकी १८ लाख २० हजार ४७५ सय कित्ता सेयर सर्वसाधारणको लागि जारी गर्ने भएको हो।
यसभन्दा अघि कम्पनीले आयोजना प्रभावित सोलुखुम्बु जिल्ला, दुधकुण्ड नगरपालिकाका स्थानीयहरूको लागि १३ लाख ५० हजार कित्ता सेयर जारी गरेको थियो।
कम्पनीको निष्काशन तथा बिक्री प्रबन्धकमा एनएमबी क्यापिटल लिमिटेडलाई नियुक्त गरिएको छ।
इक्रा नेपालले कम्पनीलाई डबल बी प्लस रेटिङ दिएको छ। यसले कम्पनीको दायित्व बहन गर्ने क्षमतामा मध्यम जोखिम रहेको संकेत गर्छ।
अपर सोलु हाइड्रो कम्पनी पहिलो पटक सन् २०१० मे २८ तारिखदेखि एक निजी कम्पनीको रूपमा सञ्चालनमा आएको हो। पछि सन् २०१७ अप्रिल १४ तारिखदेखि भने यसलाई पब्लिक लिमिटेड कम्पनीमा रूपान्तरण गरिएको हो। हाल कम्पनीले सोलुखुम्बु जिल्लामा २३.५ मेगावाटको सोलु एचइपी सञ्चालन गरिरहेको छ।
प्रकाशित मिति: बिहीबार, असार ९, २०७९, १३:४१:१७
