समयमै वार्षिक लेखापरीक्षण प्रतिवेदन नबुझाउने २२ कम्पनीलाई बीमा समितिले कारबाही गरेको छ । यस्ता कम्पनीहरुलाई समितिले १० हजार देखि १० हजार ५ सय रूपैयाँसम्म जरिवाना गरेको हो । कम्पनीहरूले आर्थिक वर्ष २०७७/७८ को लेखापरीक्षण प्रतिवेदन समितिमा आर्थिक वर्ष सकिएपछिको १० महिनाभित्र बुझाउनुपर्ने व्यवस्था छ।
तर, यो अवधिमा पनि प्रतिवेदन नबुझाएपछी कम्पनीहरू कारवाहीमा परेका हुन् । यसरी प्रतिवेदन नबुझाउने कम्पनीहरुमा नेपाल पुनर्बीमा कम्पनी, लाइफ इन्सुरेन्स कर्पोरेशन नेपाल, एसियन लाइफ इन्सुरेन्स, सूर्या लाइफ इन्सुरेन्स, प्राइम लाइफ इन्सुरेन्स, ज्योति लाइफ इन्सुरेन्स, रिलायन्स लाइफ इन्सुरेन्स, सिटिजन लाइफ इन्सुरेन्स, प्रभु लाइफ इन्सुरेन्स र महालक्ष्मी लाइफ इन्सुरेन्स छन्।
यसरी प्रतिवेदन नबुझाउने अन्य कम्पनीमा राष्ट्रिय बीमा संस्थान, नेसनल लाइफ इन्सुरेन्स, नेपाल लाइफ इन्सुरेन्स, गुराँस लाइफ इन्सुरेन्स, आईएमई लाइफ इन्सुरेन्स, युनियन लाइफ इन्सुरेन्स, सन नेपाल लाइफ इन्सुरेन्स, रिलायबल नेपाल लाइफ इन्सुरेन्स, सानिमा लाइफ इन्सुरेन्स, दि ओरिएण्टल इन्सुरेन्स, नेसनल इन्सुरेन्स र राष्ट्रिय बीमा कम्पनी लिमिटेड छन।
बीमा ऐन २०४९ र बीमा नियमावली, २०४९ बमोजिम कम्पनीहरूलाई आर्थिक वर्ष सकिएको १० हजारका दरले जरिवाना लगाउन सकिन्छ। दोस्रो आर्थिक वर्षलाग्दासम्म अघिल्लो पटककै विवरण नबुझाउनेलाई भने थप ५ सय रूपैयाँ जरिवाना गर्ने निर्णय समितिले गरेको हो।
